Рөстәм Миңнеханов: “Татарстан делегациясе Хельсинкига җитди ниятләр белән килде”

Бүген Татарстан Республикасы Президенты Рөстәм Миңнеханов ике көнлек эш визиты белән Финляндия башкаласы – Хельсинкига килде.

Хельсинкиның “Вантаа” халыкара аэропортында Татарстан башлыгын Финляндия тышкы эшләр министры урынбасары Яаакко Лааява, Россия Федерациясенең Финляндиядәге Гадәттән тыш һәм Тулы вәкаләтле илчесе Александр Румянцев һәм башкалар каршы алды.
Хельсинкига килүгә үк Татарстан Президенты Финляндия икътисади үсеш министры Маури Пеккаринен белән очрашты. Очрашуда шулай ук Россиянең Финляндиядәге сәүдә вәкиле Валерий Шлямин, ТР Президентының Тышкы элемтәләр департаменты директоры – ТР Президенты ярдәмчесе Искәндәр Мөфлиханов, ТР сәнәгать һәм сәүдә министры Равил Зарипов, ТР икътисад министры Мидхәт Шаһиәхмәтов һәм башкалар катнашты.

Кунакларны сәламләп, Финляндия икътисади үсеш министры Маури Пеккаринен 2005 елда республика белән икътисади элемтәләрне киңәйтү максатыннан Татарстанга Финляндиянең эшлекле даирәләре вәкилләрен алып килүен искәртте (2005 елда Татарстан Республикасында Финляндия көннәре узды).

Маури Пеккаринен хәзерге визитның Финляндия һәм Татарстан Республикасы предприятиеләре арасында яңа уртак проектлар булдыру хакында сөйләргә мөмкинлек бирәчәгенә өмет белдерде.

Үз чиратында, Рөстәм Миңнеханов Татарстан Республикасы делегациясенең Хельсинкига эшлекле элемтәләрне киңәйтүгә бәйле җитди ниятләр белән килүен билгеләп үтте. ТР Президентының сүзләренә караганда, Татарстан металлургия, мәгълүмати технологияләр, агач эшкәртү, шулай ук энергия саклау технологияләре һәм альтернатив энергетика өлкәләрендәге хезмәттәшлекне дә кертеп, барлык юнәлешләр буенча да элемтәләрне үстерергә әзер.

Алга таба Татарстан Президенты Рөстәм Миңнеханов һәм Татарстан Республикасы делегациясе вәкилләрен Финляндия Республикасы Президенты Тарья Халонен кабул итте.