Зилә Вәлиева: “Татарстан һәм Согуд Гарәбстаны арасында мөнәсәбәтләр мәдәнияткә нигезләнеп төзелә”

Согуд Гарәбстаны Корольлеге белән Татарстан арасындагы мөнәсәбәтләр үсеше нигезендә мәдәни элемтәләр ята. Бүген ТР Министрлар Кабинетында Согуд Гарәбстаны делегациясе белән очрашуда ТР Премьер-министры урынбасары Зилә Вәлиева шулай дип белдерде. Делегацияне Согуд Гарәбстанының РФ дәге Гадәттән тыш һәм Тулы вәкаләтле илчесе Али Хәсән Җәгъфәр белән мәдәният һәм мәгълүмат министры урынбасары Абдел Азиз бин Салих бин Сәлам җитәкли. Согуд Гарәбстаны делегациясе Татарстанга Ислам китапханәсе ачылышында катнашу өчен килде.

Зилә Вәлиева очрашуда билгеләп узганча, бу вакыйганың әһәмияте республиканың мәдәни тормышы белән генә чикләнми. “Моны мәгариф үсешендәге вакыйга дип санарга була. Согуд Гарәбстаны Короленең бу юмарт бүләге Ислам үсешенең тагын бер ышанычлы терәге барлыкка килүгә мөмкинлек бирә”, -дип белдерде вице-премьер.

Зилә Вәлиева соңгы еллларда Татарстанның Согуд Гарәбстаны белән мөнәсәбәтләренең бик нәтиҗәле булуын зур канәгатьләнү белән билгеләп үтте. “Татарстанда Согуд Гарәбстаны көннәре узуын хәтерлибез, Россиядә Согуд Гарәбстаны көннәренә кагылышлы чараларның сизелерлек өлешен республикада уздыру мөмкинлеге булганга сөенәбез”, - ди ул.

ТР Хөкүмәте рәисе урынбасары искәртүенчә, 2006 елда Татарстан белән Согуд Гарәбстаны мөнәсәбәтләренә җитди этәргеч бирелде. Шуннан бирле Татарстан делегацияләре әлеге гарәп илендә булып, алга таба хезмәттәшлек планнары хакында фикерләште, бу хакта сөйләшү 2009 елда Согуди-Россия форумы кысаларында да үтте. Инде планнарның бер өлеше тормышка ашкан, бер өлеше буенча эшне дәвам итәргә кирәк.

Зилә Вәлиева, аерым алганда, әлегә Согуд Гарәбстанында Татарстан көннәре узмавын искәртеп китте. Вице-премьер шулай ук республикада Согуди рәссамнарының күргәзмәсен оештыру тәкъдимен кертте. Ел саен Казанда узучы Халыкара мөселман киносы фестивалендә Согуд Гарәбстаны вәкилләре катнашып килә һәм аларның картиналары бик еш бүләкләр белән билгеләп үтелә. “Бу нәтиҗәле хезмәттәшлекне дә безгә дәвам итәргә кирәк”, - ди Зилә Вәлиева.

Аның ассызыклавынча, ике арадагы башка юнәлешләр буенча да мөнәсәбәтләр мәдәният аша урнаша. “Безнең бурыч, - ди ул, - илләребез һәм халыкларыбыз арасында төрле дәрәҗәдәге хезмәттәшлекне үстерүгә булышу”.

Согуд Гарәбстанының мәдәният һәм мәгълүмат министры урынбасары Абдел Азиз бин Салих бин Сәлам үз чиратында Татарсан ягына җылы кабул иткәннәре өчен рәхмәт белдереп, соңгы биш елда республикада өченче тапкыр булуын ассызыклады. “Ныклы элемтәләр булдыруда төп элемент булып мәдәният торуы белән тулысынча килешәм. Татарстан һәм Согуд Гарәбстаны халыклары, мәдәнияте бер-берсеннән аерылса да, аларны берләштерүче уртак нокта – Ислам бар”, - диде ул. Ул бүген Казанда Ислам китапханәсе ачылуны уртак эшнең мөһим нәтиҗәсе дип бәяләде.

Мәдәният һәм мәгълүмат министры урынбасары Согуд Гарәбстанының Татарстан мәдәнияте көннәрен кабул итәргә әзер булуын җиткерде. Ул шулай ук Корольлекнең Согуди режиссерларының Халыкара мөселман киносы фестивалендә катнашу омтылышларына ярдәм итәчәген вәгъдә итте. Аның фикеренчә, ике арада мөнәсәбәтләр дәвам итәчәк һәм көчәячәк. Элемтәләрне алга таба ныгыту өчен Абдел Азиз бин Салих бин Сәлам Татарстанда Согуд Гарәбстаны һәм әлеге гарәп илендә Татарстан мәнфәгатьләрен тәкъдим итүче вәкаләтле вәкилләр алмашу тәкъдимен кертте.