Рөстәм Миңнеханов: “Казан уртача бәяле заманча кунакханәләргә ихтыяҗ кичерә”

Бүген Татарстан Республикасы Президенты Рөстәм Миңнеханов “Центр Капитал” берләштерелгән лизинг компаниясе” ЯАҖ президенты Игорь Аванесян, “Трансстройбанк” коммерция банкы президенты Петр Читипаховян һәм «Мариотт Кортъярд» кунакханәсе генераль менеджеры Камерон Макнейлли белән очрашты.

ТР Хөкүмәте йортында узган очрашуда Казан мэры Илсур Метшин, ТР Президентының Тышкы элемтәләр департаменты директоры – ТР Президентының халыкара мәсьәләләр буенча ярдәмчесе Искәндәр Мөфлиханов катнашты.

“Трансстройбанк” коммерция банкы президенты Петр Читипаховян хәбәр иткәнчә, бүгенге көндә Татарстан федерациянең динамик үсеш кичерүче һәм икътисади яктан актив субъектларының берсе. Ул, аерым алганда, инвесторларның республикада башка төбәкләргә караганда бизнес өчен уңайлырак шартлар тудырылуы турындагы фикерен белдерде.

Проект инвесторлары фикеренчә, Казан үзәгендә төзелгән һәм презентациясе бүген узачак «Мариотт Кортъярд» кунакханәсе шәһәрнең заманча туристик инфраструктурасының бер өлешенә әвереләчәк. Ул шулай ук чит ил кунаклары һәм туристларда Татарстанның уңай имиджын булдыруга йогынты ясаячак. Кунакханә төрле бәядәге 150 номерны, күп функцияле конференцияләр залын үз эченә ала.

Бөтен дөньяга билгеле «Marriott» челтәре күп кенә илләрдәге 3700 дән артык кунакханәне берләштерә.

Очрашуда катнашучылар Казанда 2013 елда узачак җәйге Универсиада һәм 2018 елда үтәчәк футбол буенча дөнья чемпионаты кысаларындагы матчлар алдыннан аеруча актуаль төс алган республиканың туристик инфраструктурасын алга таба үстерү мәсьәләләре хакында фикер алышты.

Аерым алганда, Рөстәм Миңнеханов билгеләп үткәнчә, җитди үсеш-үзгәрешләргә дә карамастан, Казанның кунакханәләр комплексы әле дә булса уртача бәяле заманча кунакханәләргә ихтыяҗ кичерә.