Казанның дәвалау учреждениеләрендә туклануны оештыру белән җәмәгать туклануы өлкәсендә дөнья лидерларының берсе шөгыльләнергә мөмкин

Җәмәгать туклануын оештыру өлкәсендә дөнья лидерларының берсе – Франциянең “Sodexо” компаниясе Казанның дәвалау учреждениеләрендә туклануны оештыруга җәлеп ителергә мөмкин. Бүген ТР Премьер-министры Илдар Халиковның “Sodexо” компаниясенең Россия буенча генераль директоры Эди Перисик белән очрашуында шуны күздә тоткан проект тәкъдим ителде. Очрашуда шулай ук ТР сәламәтлек саклау министры Айрат Фәррахов белән Роспотребнадзорның ТР буенча идарәсе җитәкчесе Марина Патяшина катнашты.

“Sodexо” компаниясе Татарстанда көн саен “КАМАЗ” хезмәткәрләрен 22 мең берәмлек төшке аш белән тәэмин итә. Шулай ук Чаллыда төзекләндерелгән ашыгыч медицина ярдәме хастаханәсе пациентларын тукландыра. Бүген Премьер-министр Илдар Халиков “КАМАЗ” хезмәткәрләре һәм ашыгыч медицина ярдәме хастаханәсе пациентлары исеменнән “Sodexо” компаниясенә сыйфатлы азык өчен рәхмәт сүзләрен җиткерде. “Сез бу эштә уникаль алымнар табып, югары сыйфат тәэмин итә алдыгыз”, - дип ассызыклады ул.

“Sodexо”ның туклануны тәэмин итү системасы үзәк кухняда түбән температурада бик тиз катыру юлы белән азык әзерләү, әзер азыкны төргәкләү, диет-өстәлләр өчен комплектлар булдыру, азыкны китерү һәм таратуның заманча ысулларын эченә ала. Нәтиҗәдә пациентлар ланч-бокс формасында обед ала.

Бүгенге очрашуда “Sodexо” компаниясенең Чаллыдагы ашыгыч медицина ярдәме хастаханәсе белән хезмәттәшлектә үзен яхшы яктан күрсәтүе һәм республикада бу тәҗрибәне Казанда урнашкан башка дәвалау учреждениеләренә дә җәелдерү мөмкинлеге ассызыкланды.