Казанда Австрия-Татарстан эшлекле форумы ачылды

Бүген “Корстон” кунакханә сәүдә-күңел ачу үзәгендә Австрия-Татарстан эшлекле форумы ачылды. Форумны ачу тантанасында ТР Президенты Рөстәм Миңнеханов һәм Австрия Республикасы Президенты Хайнц Фишер катнашты.

Форум башланыр алдыннан Австрия кунаклары Татарстан Республикасының икътисади һәм сәнәгый потенциалы хакында сөйләүче күргәзмәдә булды. Австрия-Татарстан эшлекле форумының максаты – Татарстан һәм Австриянең сәүдә-икътисади һәм инвестицион потенциалын тәкъдим итү, Австрия Республикасы һәм Татарстан Республикасы арасында алдагы хезмәттәшлекне үстерү.

Австрия Республикасыннан килгән кунакларны сәламләп, Рөстәм Миңнеханов составына Австриянең әйдәп баручы фирмалары, банклары, инвестиция компанияләре җитәкчеләре кергән делегацияне кабул итү безнең өчен зур горурлык дип белдерде. Татарстан Президенты хәбәр иткәнчә, республика Австрия бизнесын республикага җәлеп итүгә карата кызыксыну белдерә. Ул бүгенге форум барышында яңа коммерция проектлары барлыкка киләчәгенә ышаныч белдерде. “Үзебезнең яктан без ярдәм күрсәтергә әзер”, - диде ул.

Рөстәм Миңнеханов, форумда ясаган чыгышында, Ауропаның күп кенә әйдәп баручы компанияләренең республикабыз базарында уңышлы эшләвен, төрле тармакларда эре проектларны гамәлгә ашыруга өлеш кертүләрен билгеләп үтте. “Биредә Австрия компанияләренең дә өлеше зур”, - дип ассызыклады Татарстан башлыгы һәм банк өлкәсе, нефть химиясе, машина төзелеше һәм башка тармакларда хезмәттәшлек мисаллары булуы, ТР предприятиеләренең Австрия җиһазларын куллануы хакында хәбәр итте.

Рөстәм Миңнеханов, Татарстан хакында сөйләгәндә, республиканың җәлеп ителә торган чит ил инвестицияләре күләме буенча Россиядә әйдәп баручы урыннарның берсен биләвен билгеләп үтте. ТР шулай ук югары кредит рейтингына ия.

“Татарстан сәнәгатен модернизацияләүдә катнашырга тәкъдим итәм. Безнең югары технологияләр, машина, автомобильләр төзү һәм авиатөзелеш, нефть химиясе, энергия саклау, төзелеш материаллары җитештерү, банк эшчәнлеген үстерү өлкәләрендә Австрия компанияләре белән үзара хезмәттәшлекне киңәйтү өчен зур потенциал бар. Австрия компанияләре “Алабуга” махсус икътисади зонасында производстволар булдыру мөмкинлеген карый ала. 2013 елда Казанда узачак Универсиада һәм 2018 елда үтәчәк футбол буенча дөнья чемпионатына (аның матчлары шулай ук ТР башкаласында узачак) киң колачлы әзерлеккә бәйле рәвештә хезмәттәшлек өчен киң мәйдан ачыла”, - дип ассызыклады республика башлыгы.

Ул форумда катнашучыларның уңышлы һәм нәтиҗәле эшләүләрен теләде.

Үз чиратында, Австрия Президенты Австрия һәм Татарстан арасында яхшы һәм ышанычлы мөнәсәбәтләр урнашуын билгеләп үтте. “Без алга таба да әлеге мөнәсәбәтләрне үстерү һәм киңәйтү юнәлешендә эшләячәкбез”, - диде ул. Ул Австрия-Татарстан эшлекле форумында катнашучыларны сәламләде һәм аны үткәрү үзенең уңай нәтиҗәләрен бирәчәгенә өмет белдерде.

Татарстанга визиты хакында сөйләгәндә, Австрия Республикасы Президенты болай дип ассызыклады: “Без Мәскәүгә сәфәрдән тыш, Россия Федерациясенең динамик үсеш кичерүче һәм кызыклы төбәкләренең берсенә визит белән килүгә карата кызыксыну белдергән идек. Безнең экспертларның анализы нигезендә без Казанны сайлап алдык”.

“Австрия фирмалары үз эшчәнлекләрендә бик югары нәтиҗәләргә иреште”, - дип ассызыклады ул. “Без яхшы позицияләр билибез. Җан башына күчереп исәпләгәндә, бездә тулаем эчке продукт күләме Германия, Франция һәм Швециягә караганда артыграк. Эшсезлек дәрәҗәсе бик түбән, икътисад уңышлы үсеш кичерә”, - дип ассызыклады ул.

Бүген форум барышында ике яклы хезмәттәшлекне үстерү буенча берничә документка кул куелды. Мисал өчен, ТР Премьер-министрының беренче урынбасары Равил Моратов һәм “Штрабаг АГ” Россия һәм якын чит илләр буенча төбәк идарәсе директоры, идарә әгъзасы Герхард Гритцнер ТР Хөкүмәте һәм “Штрабаг АГ” компаниясе арасында Ниятләр турындагы беркетмәне имзалады. ТР Сәүдә-сәнәгать палатасы һәм Австрия Икътисад үсешенә ярдәм күрсәтү институты арасындагы үзара аңлашу турындагы Меморандумны ТР Сәүдә-сәнәгать палатасы президенты Шамил Агиев һәм Австрия Федераль икътисад палатасы вице-президенты Рихард Шенц имзалады. Моннан тыш, бүген Татарстанның «Роял Тайм Групп» һәм Австриянең «Austrian Gaming Industries GmbH» компанияләре арасында үзара аңлашу турындагы Меморандумга кул куелды.