ТР Президенты: “Беренче тапкыр дәүләт хезмәткәрләренең керемнәре турындагы мәгълүматның дөреслеккә туры килү-килмәве тикшерелде”

Бүген ТР Хөкүмәте йортында ТР Президенты каршындагы Коррупциягә каршы көрәш советы белән Хокук тәртибен тәэмин итү буенча координацион советның уртак утырышы узды.
Утырышны Татарстан Республикасы Президенты Рөстәм Миңнеханов видеоконференция режимында үткәрде.
Республика башлыгы утырышны ачып, Советның беренче утырышыннан соң ике айдан артык кына вакыт узуга кармастан, бу чорда күп эшләр башкара алдык, дип ассызыклады. Шулай итеп, дәүләт һәм муниципаль органнар хезмәткәрләре халык алдында 2010 елга керемнәре буенча хисап тотты.
“Беренче тапкыр дәүләт хезмәткәрләренең керемнәре турындагы мәгълүматнынң дөреслеккә туры килү-килмәве тикшерелде, муниципаль хезмәткәрләр тарафыннан хезмәт итү тәртибе таләпләре үтәлү буенча да тикшерүләр үткәрелә. Ачыкланган хокук бозулар тиешле комиссияләр тарафыннан каралачак. Җавапка тартылучылар бар, чаралар күрелә”, - диде ТР Президенты.
Рөстәм Миңнеханов сүзләренә караганда, бүгенге көндә җитәкчеләрнең коррупциягә каршы көрәш проблемаларына мөнәсәбәтләре үзгәрә, әмма хәл ителмәгән мәсьәләләр күп әле.
Бүгенге утырышка чыгарылган мәсьәлә республикада дәүләт һәм муниципаль милекне куллануны көйләүдә законның үтәлеше хакында дип искәртте ул.
“Милек белән идарә итү, бигрәк тә җир участоклары белән, - коррупцион өлкәләрнең берсе. 2010 елда Татарстан Республикасы Хисап палатасы дәүләт һәм муниципаль милек һәм җир мөнәсәбәтләре өлкәсендә үткәргән тикшерүләр буенча 174 миллион 876 мең сумнан артык күләмдә хокук бозулар ачыкланган. Ел саен хокук саклау органнары тарафыннан төрле дәрәҗәдәге вазифаи затларның зур күләмдә ришвәт алуы буенча җинаять эше кузгатыла”, - дип белдерде Р.Миңнеханов.
Республикада дәүләт һәм муниципаль милекне куллануны көйләүдә законның үтәлешен тикшерү нәтиҗәләре, ачыкланган хокук бозулар хакында Татарста Республикасы прокуроры Кафил Әмиров доклад бедлән чыгыш ясады.
Хокук бозуларның күбесе муниципаль дәрәҗәдә, утырышта катнашучылар алдында Татарстан Рсепубликасы Муниципаль берәмлекләр советы рәисе Миңсәгыйть Шакиров шул хакта чыгыш ясады.
Утырыш көн үзәгенә куелган икенче мәсьәлә хокук саклау органнарының коррупциягә каршы көрәш буенча эш нәтиҗәләре иде. Бу мәсьәлә буенча ТР буенча эчке эшләр министры Әсгать Сәфәров чыгыш ясады.