ТР Президенты “Алабуга” махсус икътисади зонасында автокомпонентлар китерүчеләр белән киңәшмә үткәрде

Бүген Татарстан Президенты Рөстәм Миңнеханов “Алабуга” махсус икътисади зонасында булды. РФ икътисади үсеш министры урынбасары Олег Савельев белән бергә республика башлыгы резидентларның ике предприятиесе төзелеш мәйданчыкларын карады һәм автокомпонентлар китерүчеләр белән киңәшмә үткәрде.

Рөстәм Миңнеханов һәм Олег Савельев «Роквул-Волга» һәм «Кастамону интегрейтед вуд индастри» компанияләренең сафка бастырылучы заводларында булды. «Роквул-Волга» заводы җылылык изоляциясе материаллары җитештерү өлкәсендә дөньякүләм лидерлардан саналган халыкара «Rockwool» компанияләр төркеме составына керә. Предприятие “Алабуга” махсус икътисади зонасында таш мамык нигезендәге янмый торган җылылык изоляциясе эшләп чыгарачак, завод 2012 елның февралендә эшли башлар дип көтелә.

«Kastamonu Integrated Wood Industry and Trade Co» (Төркия) компаниясенең Алабугадагы заводын төзү эшләре 2011 елда башланган. Әлеге предприятиедә МДФ-панельләр җитештереләчәк.

Киңәшмәне ачып, Рөстәм Миңнеханов республика җитәкчелеге махсус икътисади зонаны үстерүдә яхшы перспективалар күрә, дип билгеләп үтте. ТР Президенты искәртеп узганча, махсус икътисади зона автомобильләр, автокомпонентлар һәм төзелеш материаллары җитештерү, полимерлар эшкәртү кебек берничә төп юнәлештә махсуслаша.

Бүгенге киңәшмәдә махсус икътисади зонада яңа автокомпонентлар производстволары барлыкка килү мөмкинлеге белән бәйле мәсьәләләр хакында фикер алыштылар.

РФ икътисади үсеш министры урынбасары Олег Савельев үз чыгышында “Алабуга” махсус икътисади зонасын үстерүдә автокомпонентлар юнәлешен сайлауның дөреслеген билгеләп үтте. О.Савельев хәбәр иткәнчә, Россия Федерациясенең автомобиль базары үсеш кичерә. Аның сүзләренә караганда, предприятиеләрне махсус икътисади зонада урнаштыру нәтиҗәсендә автокомпонентлар эшләп чыгаручылар шуның белән бәйле ташламалар алачак, бу Россиядә эшләүче автоҗитештерүчеләр өчен дә өстенлек булачак.

“Россия Федерациясе һәм Татарстан Республикасы ягыннан махсус икътисади зона резидентларына уңайлы шартлар тәэмин итү өчен барлык тиешле чаралар да күрелә һәм алга таба да күреләчәк”, - дип ышандырды Олег Савельев киңәшмәдә катнашучыларны.

Үз чиратында ТР Президенты Рөстәм Миңнеханов хәбәр иткәнчә, полимер җитештерүчеләр – республиканың өстенлекләреннән берсе. “Без автокомпонентлар эшләп чыгару өчен кирәкле чималны үзебездә җитештерү юнәлешендә җитди эш алып барабыз”, - диде республика башлыгы.

РФ икътисади үсеш министры урынбасары Алабугада яңа резидентлар барлыкка килү белән торак төзелешенең актив рәвештә алып барылачагын билгеләп үтте. “Бу чын мәгънәсендә искиткеч инфраструктуралы яңа шәһәр булачак”, - дигән өметен белдерде ул.

Киңәшмә ахырында Татарстан Президенты Рөстәм Миңнеханов ТР җитәкчелегенең инвесторларга ярдәм күрсәтергә әзер торуын раслады. “Без “Алабуга” махсус икътисади зонасын үстерүгә җитди карыйбыз һәм үзебезнең инвесторлар өчен уңайлы шартлар тудырырга әзербез”, - дип белдерде республика башлыгы.