Рөстәм Миңнеханов Латвиянең Россия Федерациясендәге Гадәттән тыш һәм Тулы вәкаләтле вәкиле белән очрашты

Бүген Татарстан Президенты Рөстәм Миңнеханов Латвия Республикасының Россия Федерациясендәге Гадәттән тыш һәм Тулы вәкаләтле илчесе Эдгарс Скуя белән очрашты.

ТР Хөкүмәте йортында узган очрашуда шулай ук Тышкы элемтәләр департаменты директоры – ТР Президенты ярдәмчесе Искәндәр Мөфлиханов, Татарстан сәнәгать һәм сәүдә министрының беренче урынбасары Игорь Носов, Казан мэры Илсур Метшин, ТР Кече һәм урта эшкуарлыкны үстерү комитеты рәисе Линар Якупов катнашты.

Рөстәм Миңнеханов Татарстан һәм Латвиянең хезмәттәшлекне үстерү өчен потенциалы булуын билгеләп үтте. Р.Миңнехановның сүзләренә караганда, хәзерге вакытта Латвия Республикасы һәм ТР арасындагы тышкы сәүдә әйләнешенең нигезен Татарстан нефть һәм нефть химиясе продуктлары экспорты тәшкил итә. Шул ук вакытта Латвия тауарлары Татарстанга әлегә аз күләмдә китерелә.

ТР Президенты хәбәр иткәнчә, республикада Латвия катнашында 7 компания эшли, аларның санын арттырырга кирәк. “Универсиада алдыннан без яңа рестораннар, кунакханәләр, машина кую урыннары барлыкка килүгә карата кызыксыну белдерәбез”, - дип ассызыклады ул.

Үз чиратында, Эдгарс Скуя хәбәр иткәнчә, Латвия эшлекле даирәләр ягыннан Татарстанга карата зур кызыксыну белдерә. Бүгенге очрашуда Рөстәм Миңнехановка Казанда Латвиянең «Lido» фирмасы рестораннар челтәрен оештыру проекты тәкъдим ителде.

Рөстәм Миңнеханов әлеге проектны хуплады. “Безнең өчен бу юнәлеш өстенлекле санала, 2013 елда бездә рестораннар челтәре булсын өчен эшне хәзер үк башларга кирәк”, - дип белдерде Татарстан Президенты.

Очрашу ахырында Эдгарс Скуя эшлекле хезмәттәшлекнең яңа мөмкинлекләрен карау өчен Рөстәм Миңнехановны Татарстан эшкуарлары делегациясе белән Латвиягә чакырды.