Михаил Бабич һәм Николай Патрушев ТР Премьер-министры белән бергә Казан авиация заводында булдылар
Бүген РФ Президентының Идел буе федераль округындагы тулы вәкаләтле вәкиле Михаил Бабич һәм Россиянең Куркынычсызлык Советы секретаре С.П.Горбунов исемендәге Казан авиация заводы – “Туполев” ГАҖ филиалы цехларында булдылар.
Кунакларны ТР Премьер-министры Алексей Песошин , ТР вице-премьеры - ТР сәнәгать һәм сәүдә министры Альберт Кәримов, “Туполев” ГАҖ генераль директоры Александр Конюхов, “Туполев” ГАҖ генераль директорының беренче урынбасары - С.П.Горбунов исемендәге Казан авиация заводы директоры Николай Савицких озата йөрде.
Завод мәйданчыкларын карау барышында предприятие җитәкчелеге Ту-214, Ту-22МЗ, Ту-160 һава судноларын җитештерү программалырының агымдагы торышы турында сөйләделәр.
“Бүген Казанда Берләштерелгән авиатөзелеш корпорациясе инвестицион программалары ярдәмендә завод проектлаштыру, җитештерү һәм заманча техниканы сынауның төп юнәлешләрендә иң алдынгы технологияләрне алачак”, - дип билгеләде Михаил Бабич.
Завод җитәкчелеге хәбәр иткәнчә, Казан авиация заводын яңарту 2020 елга кадәр дәвам итәчәк. Заманча технологик җиһазлар урнаштыру, инженер челтәрләрен, коммуникацияләрне һәм җитештерү мәйданчыкларын реконструкцияләү башкарыла.