Виктор Зубков урман янгыннарын профилактикалау җайга салынган Татарстан җитәкчелегенә рәхмәт белдерде

РФ Хөкүмәте рәисенең беренче урынбасары Виктор Зубков бүген ил төбәкләре вәкилләре катнашында Россия территориясендә урман янгыннарын кисәтү һәм бетерү чараларына багышланган видеокиңәшмә үткәрде. Татарстан ягыннан чарада ТР Премьер-министрының беренче урынбасары Равил Моратов катнашты.
Янгын куркынычы аеруча зур булган чор җитте, дип ассызыклады киңәшмәне ачкан Виктор Зубков. Ләкин әле кайбер төбәкләрдә бу чорга тиешле әзерлек юк. Узган киңәшмәдә 15 төбәкнең янгыннар сүндерүгә кагылышлы, патрульлек итү маршрутлары һәм җәлеп ителгән көчләр күрсәтелгән җыелма планнарын тәкъдим итмәве игълан ителгән булса, бу юлы андый төбәкләр саны дүрткә калган. Хөкүмәт рәисенең беренче урынбасарын, барыннан да элек җыелма планнар тәкъдим итмәгән төбәкләрдәге вәзгыять кызыксындырды.
Соңгы мәгълүматларга караганда, ил күләмендә урман янгыннарыннан Свердловски, Омски һәм Томски өлкәләрендә 11 торак пункт зыян күргән. Виктор Зубков сүзләренә караганда, быел Россия Хөкүмәте әлеге актуаль мәсьәләне чишү өчен өстәмә финанслар бүлгән. Урман хуҗалыгын финанслау күләме ике тапкырга үскән, янгынга каршы көрәш өчен 2 мең берәмлектән артык техника һәм җиһазлар сатып алуга финанслар бүленгән. Янгынга каршы инвентарьлар белән җиһазландыру эше дә тәмамланып килә.
Янгыннар белән көрәштә төп бурычларның берсе итеп Виктор Зубков урман янгыннарында гаеплеләрне ачыклау һәм җәзага тартуны атады. Хөкүмәт рәисенең беренче урынбасары муниципалитетлар белән активрак эшләргә чакырды.
Виктор Зубков җәйге чорда Татарстанда алып барылучы оештыру эшләрен, урман янгыннарын профилактикалау эшенең җайга салынуын үрнәк итеп китереп, республика җитәкчелегенә рәхмәт белдерде.