ЯҢАЛЫКЛАР

Бүген Татарстан Республикасы Президенты Рөстәм Миңнеханов көннең икенче яртысында Нововоронежский АЭС мәйданчыгында РФ Президенты каршындагы Икътисадны модерниацияләү һәм инновацион үсеш советының президиум утырышында катнаша.

Агымдагы елның гыйнвар-октябрь айларында Татарстан территориясендә 278 млрд сумлык салым җыелган. Бу, узган елның шул чорына караганда, 17,8 процентка, ягъни 44 млрд 100 млн сумга күбрәк. Шуның 154,9 млрд сумы федераль казнаны тулыландырган, ТР консолидацияләнгән бюджетына 123,1 млрд сум җыелган. Шул исәптән 99,6 млрд сум Татарстан казнасына алынган, 23,5 млрд сум җирле бюджетларны тулыландыруга киткән. Җыелган салым түләүләре күләме буенча бүген Татарстан Идел буе федераль округында беренче, ил күләмендә алтынчы урында бара. Әлеге саннарны бүген ТР Хөкүмәте йортында узган брифингта Федераль салым хезмәтенең ТР идарәсе җитәкчесе Марат Сафиуллин җиткерде. Матбугат очрашуында салым органнарының 2012 елның узган 10 аендагы эшчәнлегенә йомгак ясалды.

БМО белешмәсе буенча, юлларда транспорт һәлакәтләре һәр елны 1 миллион 300 мең кешенең гомерен өзә, тагын 20-50 миллион кешегә тән казасы сала. Юлларда килеп чыккан транспорт һәлакәтләре нәтиҗәсендә, җир йөзендә көн дә 3 меңләп кеше арабыздан мәңгелеккә китеп бара һәм аларның күпчелеген 15 яшьтән алып 44 яшькә кадәр иң продуктив буын тәшкил итә, аларның тагын 100 мең тирәсе җитди имгәнә, җәрәхәтләнә. Татарстандагы юлларда гына да соңгы 10 айда кешеләргә турыдан-туры бәла-каза, фаҗига китергән 4596 транспорт һәлакәте булган: аларның 38,9 проценты яки 1790ы транспорт бәрелешүгә, 32,5 проценты яисә 1495е җәяүлеләрне таптатуга карый, 15 процентка якыны яки 681 очракта машина әйләнеп капланган. Шушы 4596 транспорт һәлакәтендә республикабызда 586 кеше һәлак һәм 5950се тән казасына дучар булган.

Бүген Казанда ТР Президенты Рөстәм Миңнеханов “МакХэппи көне” хәйрия акциясенә старт бирде. Шулай ук акциядә Россиядә һәм Көнчыгыш Европада “Макдоналдс” президенты Хәмзәт Хасбулатов, Казан мэры Илсур Метшин катнашты.

Бүген Татарстан Президенты Рөстәм Миңнеханов Educare Co-operative Limited (Educare) компаниясе башкарма директоры Майк Марияппа Тируман белән очрашты. Казан Кремлендә узган очрашуда Татарстан Республикасын ТР мәгариф һәм фән министры Энгель Фәттахов, ТР Президенты ярдәмчесе Радик Гыйматдинов һ.б. тәкъдим итте.

Бүген ТР Президенты Рөстәм Миңнеханов “Пивоварня Москва-Эфес” ЯАҖ генераль директоры Әхмәт Тугрул Агырбаш белән очрашты.

Бүген ТР Президенты Рөстәм Миңнеханов “КАМАЗ” ААҖ генераль директоры Сергей Когогинга “Татарстан Республикасы каршындагы казанышлары өчен” орденын тапшырды. Казан Кремлендә узган тантанада ТР Премьер-министры Илдар Халиков та катнашты.

Бүген Казанда ТР Премьер-министры Илдар Халиков РФдә Корея Республикасы илчесе Ви Сон Лак белән очрашты. Очрашуда ТР яшьләр эшләре, спорт һәм туризм министры Рафис Борһанов, Россия тхэквондо берлеге президенты Анатолий Терехов катнашты.

ТРда бүгенгә 1 миллион 917 мең кв.метр фатир сафка бастырылган, бу еллык биремнең 77 процентын тәкшкил итә. Бу хакта бүген ТР Премьер-министры Илдар Халиков уздырган ТР Хөкүмәт Йортындагы киңәшмәдә белдерелде. Чара видеоконференция режимында үтте.

Бүген Татарстан Сәүдә-сәгәгать палатасы 20 еллыгын билгеләп үтә. Шул уңайдан Сәүдә-сәнәгать палатасының Административ советы һәм Идарәсенең киңәйтелгән утырышы узды. Аның эшендә ТР Премьер-министры Илдар Халиков, РФ Сәүдә-сәнәгать палатасы президенты Сергей Катырин, Россия кече һәм урта эшмәкәрлеккә ярдәм агентлыгы генераль директоры Виктор Ермаков һ.б кунаклар катнашты. Юбилей чарасы котлау чыгышларыннан гына тормады. Эшмәкәрләр бүген үзләрен борчыган актуаль мәсьәләләрне дә күтәрде.