ЯҢАЛЫКЛАР

Бүген Татарстан Республикасы Хөкүмәт йортында Татарстан Республикасы Министрлар Кабинеты һәм Дәүләти теркәү, кадастр һәм картография федераль хезмәте арасында кадастр мөнәсәбәтләре, күчемсез милеккә булган хокукларны дәүләти теркәү һәм шуңа бәйле эшләрне башкару өлкәсендә дәүләт хезмәтен электрон рәвештә “бер тәрәзә” режимында күрсәтү мәсьәләсе буенча хезмәттәшлек итү турындагы килешүгә кул куелды.
Документка Татарстан Премьер-министры Рөстәм Миңнеханов һәм Дәүләти теркәү, кадастр һәм картография федераль хезмәте җитәкчесе Сергей Васильев кул куйды.

Халыкка дәүләт хезмәте күрсәтү процедурасын электрон рәвешкә күчерү бүгенге көндә Россиядә өстенлекле проектларның берсе булып тора. Бүген Казанда узган күчмә киңәшмәдә бу турыда Россия Хөкүмәте вице-премьеры – Россия Хөкүмәт аппараты җитәкчесе Сергей Собянин әйтте.
Шуны искәртик: Сергей Собянин Казанга эш визиты белән килгән. Визитның төп максаты – “Электрон Хөкүмәт элементларын булдыруда Татарстан тәҗрибәсе, гражданнар һәм оешмаларга мәгълүмати-коммуникацион технологияләр кулланып хезмәт күрсәтү буенча башкарма хакимиятнең федераль органнары эшчәнлеге турында” дигән темага киңәшмә үткәрү.

Бүген Татарстан башкаласына эш визиты кысаларында Россия Хөкүмәте рәисенең урынбасары – Россия Хөкүмәт аппараты җитәкчесе Сергей Собянин кайбер объектларны карап чыкты.
Шуны искәртик: Сергей Собянин һәм аны озатып йөрүче кешеләр бүген иртән “Казан” халыкара аэропортына килеп җиттеләр. Кунакларны Татарстан Президенты Минтимер Шәймиев, Татарстан Премьер-министры Рөстәм Миңнеханов һәм башка рәсми затлар каршы алды.

Бүген, 24 нче августта, Татарстан башкаласы Казанда “Электрон Хөкүмәт элементларын булдыруда Татарстан тәҗрибәсе, гражданнар һәм оешмаларга мәгълүмати-коммуникацион технологияләр кулланып хезмәт күрсәтү буенча башкарма хакимиятнең федераль органнары эшчәнлеге турында” дигән темага күчмә киңәшмә булачак.
Киңәшмәне Россия Хөкүмәте рәисенең урынбасары – Россия Хөкүмәт аппараты җитәкчесе Сергей Собянин үткәрәчәк. Ул Казанга эш визиты белән килә.

2009 елның калган дүрт аенда Татарстан Республикасына якынча 650 мең кв. метр торакны төзелешкә кертергә кирәк. Бүген Татарстан Республикасы Министрлар Кабинетында узган киңәшмәдә бу турыда республикабыз Премьер-министры Рөстәм Миңнеханов әйтте.
Киңәшмә торакны файдалануга тапшыру мәсьәләләренә багышланган иде һәм ул, Татарстанның барлык муниципаль районнарын тоташтырып, видеоконференцэлемтә режимында узды.

Бүген Татарстан башкаласына ике көнлек эш визиты белән Россия Федерациясенең эчке эшләр министры, армия генералы Рәшит Нургалиев һәм Таҗикстанның эчке эшләр министры, милиция генерал-лейтенанты Абдурахим Кахаров килде.
“Казан” халыкара аэропортында кунакларны Татарстан Республикасы Премьер-министры Рөстәм Миңнеханов, Татарстан Республикасының эчке эшләр министры Әсгать Сәфәров, Татарстан Республикасының баш федераль инспекторы Марсель Галимәрдәнов каршы алды.

Бүген Татарстан Республикасы Премьер-министры Рөстәм Миңнеханов Нефть эшкәртү һәм нефть химиясе заводлары комплексының объектларын төзү буенча республика штабы утырышын үткәрде (Түбән Кама).

Утырышта подрядчы оешмалар җитәкчеләре, “ВНИПИнефть” проект институты, Fluor компаниясе вәкилләре катнашты.

Нефть, газ, химия комплексы мәсьәләләре буенча Татарстан Республикасы Премьер-министры ярдәмчесе Ринат Сабиров хәбәр иткәнчә, утырыш барышында төзелеш мәсьәләләре турында фикер алышканнар.

Татарстан Республикасының хөкүмәт башлыгы Рөстәм Миңнеханов, республика штабы әгъзалары алдында чыгыш ясаганда, графиктан тайпылмыйча эшләү, төзелеш материаллары белән тәэмин итүне оештыру бурычларын куйды.

Бүген Татарстан Республикасында дәүләт гражданнар хезмәтен һәм муниципаль хезмәтне үстерү комиссиясе әгъзалары Татарстан Республикасы Премьер-министры Рөстәм Миңнеханов җитәкчелегендә Татарстан Республикасында 2010-2013 елларга дәүләт гражданнар хезмәтен һәм муниципаль хезмәтне үстерү республика максатчан программасының проекты турында фикер алыштылар.

Программаның заказчысы – Татарстан Республикасы Министрлар Кабинеты, координаторы – Татарстан Республикасы Президенты каршындагы Дәүләт хезмәткәрләре эшләре департаменты.

Документны Татарстан Республикасының юстиция министры Мидхәт Корманов тәкъдим итте (Татарстан Республикасының Юстиция министрлыгы максатчан программаны эшләүче булып тора).

2009 ел ахырына кадәр Россиядә минималь пенсия яшәү минимумы дәрәҗәсенә җитәргә тиеш. Бүген Казанда бу турыда Россия Пенсия Фонды рәисе Антон Дроздов әйтте.

Шуны искәртик: Татарстан башкаласына Антон Дроздов эш визиты белән килде. Ул “Россия Пенсия Фонды органнарын 2010 елда мәҗбүри пенсия һәм медицина иминиятләштерүенә иминият кертемнәре белән идарә итү шартларында эшләүгә әзерләү” төбәкара семинарында катнаша.

Семинарда Татарстан Премьер-министры Рөстәм Миңнеханов та катнашты.

Татарстан Республикасында Татарстан Республикасы Министрлар Кабинеты акчасына бюджет оешмаларын Россия Пенсия Фондының Татарстан Республикасындагы бүлеге белән электрон документ алмашуга тоташтыру мәсьәләсе хәл ителгән. Бүгенге көндә эш белән тәэмин итүче иминиятләштерүчеләрнең 27 проценты Россия Пенсия Фондына мәгълүмат тапшыруның контактсыз технологиясенә тоташтырылган инде. Бүген Россия Пенсия Фонды органнарын 2010 елда мәҗбүри пенсия һәм медицина иминиятләштерүенә иминият кертемнәре белән идарә итү шартларында эшләүгә әзерләү буенча үткәрелгән төбәкара семинарда бу турыда Татарстан Премьер-министры Рөстәм Миңнеханов хәбәр итте.