Рөстәм Миңнеханов: “Шәһәр һәм район җитәкчеләре эшчәнлегендә ветераннар тәҗрибәсенә таянырга тиеш”

Бүген Казанның “Корстон” кунакханә-сәүдә-күңел ачу комплексында Татарстан Президенты Рөстәм Миңнеханов катнашындаТатарстан Республикасы ветераннарының (пенсионерлары) иҗтимагый оешмалары Республика советының VI хисап-сайлау конференциясе узды. Аның эшендә шулай ук ТР Дәүләт Советы Рәисе урынбасары Римма Ратникова, ТР Премьер-министры урынбасары Зилә Вәлиева,ТР муниципаль берәмлекләре советы рәисе Минсәгыйть Шакиров, министрлык һәм ведомство җитәкчеләре, муниципаль берәмлек башлыклары, пенсия яшендәге вәкилләр катнашты.
Конференциянең эшче органнары – редакция, мандат комиссияләрен сайлап кую белән башланган конференция, ТР ветераннарының (пенсионерлары) иҗтимагый оешмалары Республика советы рәисе Рафис Әхмәтҗанов доклады белән дәвам итте. Ул 2006 елның сентябреннән агымдагы елның октябренә кадәр вакыт эчендә башкарылган эшләр буенча хисап тотты.
Яр Чаллы шәһәре ветераннары советы рәисе Наил Сафин, Зәй муниципаль районы башлыгы Татьяна Воропаева, Арча муниципаль районы ветераннары советы рәисе Илдус Сәгъдиев һәм башкалар чыгыш ясады, һәркайсы “авырткан” урыннарына басым ясап, төрле проблемаларга тукталды. ТР Хезмәт, мәшгульлек һәм социаль яклау министры Айрат Шәфигуллин докладында, күп кенә өлкән буын вәкилләренең актив булуын, аларның гаилә тормышының иҗтимагый хәрәкәт белән бергә үрелеп баруын билгеләп узды.
Конференция эшчәнлегенә ТР Президенты Рөстәм Миңнеханов чыгышы нокта куйды. Республика башлыгы конференция барышында яудырылган сорауларга җавап бирергә тырышты һәм күп мәсьәләләрнең хәл ителәчәгенә ышандырды. “Бүген бирегә республиканың югары җәмгыять вәкилләре, һәр территориянең активистлары җыелган. Без сезнең сүзегезгә колак салып кына калмыйбыз, һәрвакыт сезнең сүздән чыкмаска тырышабыз. Сез сикәлтәле гомер юлы узып, бай тормыш тәҗрибәсе туплаган шәхесләр. Сезнең һәр сүзегез, тәкъдимегез халык өчен бик мөһим. Мин кайда гына, кем булып кына эшләсәм дә, аксакаллар фикеренә таянып эшләдем”, - дип сәламләде Президент пенсионерларны һәм аларга рәхмәтен җиткерде. Аның әйтүенчә, теге яки бу районда үзгәрешләр, яңарышлар белән танышып бару безнең өчен бик мөһим. Ул республиканың куәтле фәнни-тикшеренү комплексына әверелүенең бер көнлек кенә эш булмавын, ә көчле капиталга еллар аша ирешелгәнен ассызыклады. Сүз уңаеннан ул Татарстанның икътисади-социаль үсеш күрсәткечләренә, сәнәгать, авыл хуҗалыгы һәм башка тармаклар үсешенә күзәтү ясады. Әгерҗе муниципаль районы ветераннары советы рәисе Равия Лутошкинаның хезмәт базарында яшь белән бәйле рәвештә дискриминация күзәтелә дигән шикаятенә, Президент акыл ияләрен эшкә җәлеп итү мөһим, аларны стимуллаштыру кирәк, дип җавап бирде.
Кадет мәктәпләрендә тәрбияләнүчеләрне форма белән тәэмин итү хәйран кыйбатка төшүен һәм аларны кирәк-яраклар белән тәэминатка дәүләт үз өлешен кертсен иде дигән үтенечне дә хуплап, Рөстәм Миңнеханов аз керемле гаиләләргә ярдәм итү юлларын җайга салачакбыз, дип ышандырды.
ТР хакимияте органнары каршында ветеран эшләре буенча координацияле совет булдыру тәкъдимен дә Президент кире какмады, бу юнәлештә карар кабул ителәчәге турында әйтеп узды.
“Шәһәр һәм район җитәкчеләре эшчәнлекләрендә ветераннар тәҗрибәсенә таянырга тиеш. Ветеран оешмалары өчен акча тапмаган муниципаль берәмлек башлыкларына карата минем сүзем юк, аларны кирәкле финанс чаралары белән һичшиксез тәэмин итү мөһим, пенсионер оешмалары өчен махсус грант системасы да гамәлдә булачак”, - дип белдерде республика җитәкчесе.
“Республика үсешендә югары үрләргә ирешүдә минем өчен сезнең ярдәмегез бик кирәк”, - дип тәмамлады ул чыгышын.