Илдар Халиков: “Тотрыклы икътисади үсешне тәэмин итү глобальләшү процессларының тискәре йогынтысыннан саклауда хәлиткеч фактор”

Бүген “Корстон”да “Тормыш иминлегенең заманча проблемалары: теория һәм практика” дигән II халыкара фәнни-гамәли конференциянең пленар утырышы ачылды. Кичә конференциядә катнашучы Россия һәм чит илләр белгечләре юлларда тормыш куркынычсызлыгын тәэмин итү, иминлек һәм җәмгыять, экологик иминлекнең актуаль проблемалары, гадәттән тыш хәлләрдә иминлекне тәэмин итү, сәламәт шәхес турында секцияләрдә фикерләште.

Дистәдән артык ил вәкилләрен бер мәйданга җыйган әлеге чараны иминлекне тәэмин итү өлкәсендә халыкара хезмәттәшлекне киңәйтү максатыннан ТР Министрлар Кабинеты оештырды.

Бүген ТР Премьер-министры рәислегендә узган пленар утырышта РФ ЭЭМ Юл хәрәкәте иминлеген тәэмин итү буенча Баш идарәсе җитәкчесенең беренче урынбасары Владимир Швецов, Транспорт өлкәсендә күзәтчелек буенча федераль хезмәт җитәкчесе урынбасары Владимир Черток, Россия һәм чит илләрнең министрлык-ведомстволары, фәнни учреждениеләре җитәкчеләре һәм экспертлары катнашты.

Илдар Халиков конференция делегатларын ТР Президенты Рөстәм Миңнеханов исеменнән сәламләде. Хөкүмәт рәисе белдерүенчә, дөнья үсешендәге глобаль процесслар уңай үзгәрешләр белән берүк вакытта дәүләт, җәмгыять, шәхес иминлегенә яңа бәла-казалар янауга да китерә. Шул шартларда илкүләм иминлекне тәэмин итү белән бәйле проблемалар кискенләшә. “Халыкны глобальләшү процессларының тискәре йогынтысыннан саклауда хәлиткеч фактор булып тотрыклы икътисади үсешне тәэмин итү санала. Нәкъ менә икътисади үсеш республикага дөньядагы финанс кризисын чагыштырмача тыныч узарга, икътисадта һәм социаль өлкәдә тотрыклылыкны сакларга ярдәм итте”, -дип белдерде ул.
Ләкин техноген, табигый, геологик-социаль характердагы бәла-казалар республиканы да читләп үтми. Илдар Халиков сүзләренә караганда, Татарстанда ел саен шундый 50 гә якын гадәттән тыш хәл теркәлә. “Табигый казалар, янгыннар, техноген һәлакәтләр кеше тормышының барлык өлкәләре өчен куркыныч тудыручы чыганак булып санала. Дәүләт экологияне, тереклек системаларын саклау, табигатьтән нәтиҗәле файдалану буенча зур җаваплылык тота”, - дип ассызыклады премьер.

Ул Татарстанда халыкны тышкы һәм эчке хәвеф-хәтәрләрдән югары дәрәҗәдә саклауга йөз тоткан тулы бер чаралар комплексы гамәлгә ашырылуга тукталып, республикада берьюлы берничә хезмәтнең оператив эшчәнлеген тәэмин итү өчен, гадәттән тыш хәлләрне кисәтү, нәтиҗәләрен бетерү буенча бердәм дәүләт системасын формалаштыру буенча зур эш баруын искәртте. “Юл хәрәкәте кагыйдәләрен бозуны видеофиксацияләү системасын гамәлгә кертеп, хәрәкәт иминлеген күтәрү буенча 2006-2012 елларга исәпләнгән федераль программада расланган күрсәткечләргә ирештек”, -ди Илдар Халиков. Ул моңа өстәп, Казан шәһәрендә урам-юл челтәрен үстерү программасы эшләнүенә игътибар юнәлтте. Илкүләм, халыкара чараларны елдан-ел күбрәк кабул иткән Казанда җәмгыять иминлеген тәэмин итү мәсьәләсе аеруча актуаль.Әлеге программа 2013 елда башкалада узачак Универсиада белән тыгыз бәйләнгән.

Дәүләт һәм җәмәгать иминлеген тәэмин итүне Илдар Халиков эшчәнлекнең мөһим юнәлеше буларак билгеләп узды. Аның белдерүенчә, бу җинаятьчелек, коррупция, террорчылык, экстремизмга каршы көрәшкә дә, гражданнарның хокукларын һәм законлы мәнфәгатьләрен саклауга да кагыла. Премьер-министр республикада хокук бозуларны профилактикалауның нәтиҗәле системасы формалашуына, коррупциягә каршы комплекслы программаның тормышка ашырылуына тукталды. Республиканың иминлек параметрлары буенча күп кенә төбәкләрдән өстен торуын да искәртте. “Шулай да, ирешелгәннәргә карамастан, без бу олы юлның башында гына”, - ди ул.

Соңрак журналистлар белән булган әңгәмә вакытында Илдар Халиков әлеге халыкара конференциянең Татарстанга иминлек өлкәсендә ирешелгән тәҗрибә белән уртаклашу, башкалар тәҗрибәсен дә өйрәнү ягыннан да файдалы булуын җиткерде. Аның фикеренчә, иминлекне тәэмин итү акчалар салу белән генә чикләнә алмый. “Аның нәтиҗәсе яңа технологияләрдә, җиһазларда, алымнарда чагылырга тиеш”, - ди ул.

Илдар Халиков әлеге яңалыклар белән таныштыруда бүген “Корстон”да ачылган кебек күргәзмәләрнең зур роль уйнавын ассызыклый. Премьер-министр бүгенге күргәзмәдә катнашучыларның яртысыннан артыгы Татарстан белән хезмәттәшлек итүен искәртеп, бу юлы да файдалы килешүләр имзаланачагын белдерде. Мәсәлән, күргәзмәнең яңалыгы булган стационар видеокүзәтү, зур шәһәр белән идарә итү системлары буенча җитештерүчеләр белән сынау рәвештәндә эксплуатацияләү килешүе имзаланырга мөмкин.

Пленар утырышта чыгыш ясаган РФ ЭЭМ Юл хәрәкәте иминлеген тәэмин итү буенча Баш идарәсе җитәкчесенең беренче урынбасары Владимир Швецов транспорт, юл хәрәкәте иминлеген тәэмин итү проблемаларына тукталды.

“Бу юнәлештә тагын да комплекслырак эшләргә кирәк әле. Пропаганда эшеннән башка, халыкның белемен күтәрми, менталитетын үзгәртми торып юл хәрәкәте иминлеген тәэмин итүдә нәтиҗәлелеккә ирешеп булмаячак”, дип аның сүзләрен куәтләде ТР Премьер-министры.