Борис Громов: Татарстан - Мәскәү өлкәсенең иң зур сәүдә-икътисадый һәм инвестицион партнерларының берсе

Бүген Татарстан Республикасы Хөкүмәте һәм Мәскәү өлкәсе Хөкүмәте арасында сәүдә-икътисади, фәнни-техник һәм социаль-мәдәни хезмәттәшлек турындагы килешүгә кул куелды.
Документны Татарстан Президенты Рөстәм Миңнеханов һәм Мәскәү өлкәсе губернаторы Борис Громов имзалады.
Документка Мәскәү өлкәсе Хөкүмәтенең утырышлар залында кул куелды һәм ул онлайн режимында трансляцияләнде.
Килешүгә кул куелганчы Борис Громов Татарстан делегациясенә кайнар сәламнәрен җиткерде. Ул билгеләп үткәнчә, Татарстан Республикасы Мәскәү өлкәсенең Россиянең башка төбәкләре арасында иң эре сәүдә-икътисади һәм инвестицион партнерларыннан берсе. ТР һәм Мәскәү өлкәсе арасындагы хезмәттәшлек турында сөйләгәндә, Борис Громов үзара мөнәсәбәтләрнең үсеш динамикасы уңай булуын билгеләп үтте. Ул 2011 ел нәтиҗәләре буенча үзара тауар әйләнешенең 30 миллиард сумнан артып китүе хакында хәбәр итте. “Безнең фикеребезчә, тауар әйләнеше алга таба да артачак”, - диде Мәскәү өлкәсе губернаторы.
Борис Громов төбәкләрнең икътисад, авыл хуҗалыгы, халыкны социаль яклау, мәгариф, сәүдә һәм башка өлкәләрдә хезмәттәшлек итүен билгеләп үтте. Инвестицион хезмәттәшлек тә актив үсеш кичерә - өлкә территориясендә “Татнефть”нең 88 автозаправка станциясе урнашкан, тагын 8 е төзелү стадиясендә. Социаль-мәдәни һәм туризм өлкәләрендә дә уңай элемтәләр булдырылган. “Хезмәттәшлекнең алга китүенә дә карамастан, ирешелгәннәрдә генә тукталып калырга ярамый. Алга таба хезмәттәшлек итү өчен потенциал гаять зур”, - диде Борис Громов. Аның сүзләренә караганда, мәгълүмати, энергия саклау технологияләре, төзелеш тармагын үстерү, логистик комплекслар булдыру, инновацион технологияләрне гамәлгә кертүдә уңай перспективалар бар.
Үз чиратында, Рөстәм Миңнеханов җылы кабул иткәннәре өчен өлкә җитәкчелегенә рәхмәт белдерде. Татарстан Президенты моннан алдагы килешүгә 1999 елда кул куелуын искәртте. Үзара мөнәсәбәтләрнең үсеш динамикасы күз алдында: 2002 елда үзара тауар әйләнеше күләме 3,5 миллиард сум тәшкил итсә, 2011 елда ул 30 миллиард сумга җиткән. Татарстан әлеге динмиканың дәвам итүенә карата кызыксыну белдерә, диде Р.Миңнеханов.
Татарстан Президенты билгеләп үткәнчә, республика белән Мәскәү өлкәсе арасында күп өлкәләрдә хезмәттәшлек җәелдерелгән, аерым алганда, Татарстанның 40 тан артык сәнәгать предприятиесе Мәскәү өлкәсе белән хезмәттәшлек итә. Ул бүгенге көндә Мәскәү өлкәсендә “Татнефть” ААҖ, “КАМАЗ” ААҖ, нефть химиясе предприятиеләренең тәкъдим ителүен искәртте.
Р.Миңнеханов фикеренчә, спорт, ИТ-белем бирү һәм башка өлкәләрдә дә элемтәләр булдырырга кирәк. Мәскәү өлкәсенең спорт командалары әзерләү өлкәсендәге тәҗрибәсе дә Татарстан өчен кызыклы булыр иде, дип ассызыклады ул һәм 2013 елгы Универсиадага әзерлек кысаларында республикада гаять күп санда спорт объектлары төзелүен искәртте. ТР башлыгы Мәскәү өлкәсе губернаторын Татарстанга чакырды.
Рөстәм Миңнеханов шулай ук өлкә җитәкчелегенең татар мәдәни үзәкләре ачуда ярдәм күрсәтүен билгеләп үтте. “Татарстан – сезнең стратегик партнерыгыз”, - дип сүзен йомгаклады ТР Президенты.