Казанда "Metro Cash&Carry" кибетенең икенчесе ачылды

Бүген ТР Премьер-министры Илдар Халиков Казанда икенче, Россиядә 63 нче булып ачылган Тихорецкая урамындагы сәүдә үзәгенең рәсми ачылыш тантанасында катнашты. Чарада Казан шәһәре Башкарма комитеты җитәкчесе урынбасары Руслан Нигъмәтуллин, компания җитәкчелеге вәкилләре катнашты. Тихорецкая урамында урнашкан әлеге ваклап һәм күпләп сәүдә итү үзәге беренче клиентларын 16 нчы февральдә үк кабул иткән. Компания кече һәм урта бизнес, отель һәм ресторан вәкилләренә эксклюзив тәкъдимнәр ясый.

Илдар Халиков чыгышында билгеләп үткәнчә, Казан әлеге сәүдә үзәген бик үз итте. Республикада хәзер сәүдә комплексының өченчесе ачылса, Казанда бу икенче кибет. “Компания дә төбәгебездә үз җаен тапты дип ышанасы килә. Төбәккә яңа инвестицияләр килү һәм 200 гә якын яңа эш урыннары барлыкка килүе дә зур әһәмияткә ия”, - ди Хөкүмәт башлыгы. Сәүдә үзәге төзелеше нәтиҗәсендә 20 миллион евро күләмендә инвестицияләр җәлеп ителгән.

“Бу комплекс кыска вакыт эчендә сафка бастырылды”, - дип билгеләп үтте Премьер-министр. Ул хәбәр иткәнчә, инвестор нияте белән танышуга багышланган беренче очрашудан соң бер елдан артык вакыт узмаган, ә төзелешкә нибары 6 ай вакыт сарыф ителгән.

Сәүдә үзәгенең сатулар буенча директоры Питер Боон исә Илдар Халиковка сәүдә үзәгенә килүе, республика һәм шәһәр хакимияте ярдәме белән комплексның кыска вакыт эчендә сафка басуы өчен рәхмәтен җиткерде. “Казан һәм Татарстан Республикасы Россия төбәкләре арасында аеруча зур икътисади үсеш кичерә. Кече һәм урта бизнесның югары дәрәҗәдә үсеш алуы, безнең компаниянең төбәктә эшчәнлекне җәелдерүенә җирлек тудыра”, - дип билгеләп узды Питер Боон. “Безнең даими рәвештә киң колач җәюче кибетләр челтәре җирле икътисад үсеше һәм безнең уникаль бизнес-модельдән нәтиҗәле төстә файдалана алачак клиентлар үсеше өчен куәтле этәргеч булачак. Без биредә клиенларның мәнфәгатьләрен канәгатьләндерүне күздә тотып эшләячәкбез, - ди ул.

Чыгышлардан соң мактаулы кунаклар барабан тавышы астында тасмаларны кисеп, сәүдә үзәге буенча экскурсиягә юнәлде.

Белешмә өчен. Биредә 12 мең квадрат метр мәйданда 25 меңнән артык төрле азык-төлек һәм башка куллану товарлары сатылачак.