Татарстан Президенты "Аракчино гипсы" заводында булды

Бүген Татарстан Президенты Рөстәм Миңнеханов “Аракчино гипсы” ҖЧҖ ендә булды. Республика башлыгын Казан шәһәре мэры Илсур Метшин, предприятие директоры Ринат Хәмзин, ТР Президенты каршындагы Дәүләт торак фонды башкарма директоры Тәлгать Абдуллин һәм башка рәсми затлар озатып йөрде.

Рөстәм Миңнеханов экскурсия барышында оешманың эш күрсәткечләре белән танышты һәм киләчәккә яңа бурычлар билгеләде. Производствоны карагач ул яңа җитештерү линиясенә старт бирде.

Соңгы елларда производство шактый җитди модернизация кичерә, гипсокартон җитештерү буенча цех төзелеше иң эре инвестиция проекты булган. Узган елда 89 мең тонна укмаштыру үзлеге булган гипс һәм 5 миллион квадрат метрга якын гипсокартон әзерләнгән. Былтыр предприятие кереме 406 миллион сумны тәшкил иткән. Киләчәктә гипсокартон җитештерүне елына 20 миллион квадрат метрга кадәр җиткерү ниятләнә. 2014 нче елга завод кереме 1,5 миллиард сумга кадәр җитәр дип фаразлана.

Рөстәм Миңнеханов заводның производство цехлары белән танышты, предприятие продукциясенең Россия базары даирәсендәге лидерлар белән көндәшлек итәргә сәләтле булуын ассызыклап узды.

Алга таба Президент котелны эшләтеп җибәрүче ачкычны борып, елына 60 мең тонна укмаштыргыч гипс җитештерү куәтенә ия яңа производство линиясенә старт бирде. Әлеге яңа җиһаз җитештерүчәнлек күләмен арттырып кына калмый, продукция сыйфатын да камилләштерәчәк.

Рөстәм Миңнеханов предприятиедә сакчыл җитештерүчәнлекне күздә тотарга, производство культурасын үстерергә күрсәтмә бирде, персонал өчен шартларны яхшырту һәм аларның эшен камилләштерү зарурлыгына басым ясады. “Производство культурасы – сыйфат нигезе”, - дип ассызыклый ул. “Шартларны яхшыртуга аз гына чыгымнар сарыф итеп тә, югары икътисади нәтиҗәлелеккә ирешеп була”, - дип билгеләп үтте республика җитәкчесе.

“Аракчино гипсы” ҖЧҖ 1947 нче елда оешкан һәм ул республиканың борынгы предприятиеләренең берсе санала. Быел ул 65 еллыгын билгеләп үтәчәк. Хәзерге вакытта “Аракчино гипс заводы”нда җитештерелүче гипс Россия гипс эшләнмәләре базарында көндәшлек итә һәм коры катнашмалар җитештерү өчен югары сыйфат тәкъдим итә. Сатып алучылар исемлегендә коры төзелеш катнашмаларын әзерләү буенча Юнис, Основит, ЕК Кемикал, Бергауф кебек маркалы танылган компанияләр бар.