Россия сәнәгать һәм сәүдә министры вазифаларын башкаручысына Татарстанның сәнәгый потенциалы тәкъдим ителде

Бүген РФ сәнәгать һәм сәүдә министры вазифаларын башкаручы Денис Мантуров һәм Татарстан Президенты Денис Мантуров “Казан вертолет заводы” ААҖ территориясендә оештырылган, машина төзелеше һәм оборона-сәнәгать комплексы предприятиеләрендә җитештерелгән продукция урын алган күргәзмә белән танышты.

Кунаклар “Югары технологияле продукция экспортына комплекслы ярдәм күрсәтү механизмнарын үстерү турында”гы сәнәгать буенча Координация советының беренче утырышы башланыр алдыннан 20 дән артык предприятиенең экспозициясе тәкъдим ителгән күргәзмәне карады.

Завод каршындагы мәйданчыкта машина төзелеше комплексы предприятиеләренең продукциясе тәкъдим ителгән иде.

Татарстан башлыгы Рөстәм Миңнеханов, РФ сәнәгать һәм сәүдә министры вазифаларын башкаручы Денис Мантуров һәм аларны озатып йөрүче затлар механик эшкәртү һәм композит материаллар цехларында булды. Җыю цехында алар Ми-38 вертолетының 3 нче прототибы белән танышты. Шунда ук кунакларга Ми-8 вертолеты модельләрен күрсәттеләр.

Стендлар белән танышкан вакытта Яшел Үзәннең Горький исемендәге заводында җитештерелгән А145 пассажир судносы проекты Денис Мантуровта аеруча зур кызыксыну уятты. Кунаклар шулай ук “Казан оптика-механика заводы” ААҖндә җитештерелгән, разведчиклар куллана торган “ЛПР-3” кече габаритлы лазер приборын үзләрендә сынап карады.

Күргәзмәдә шулай ук “Элерон-3СБ” дистанцион күзәтү комплексы тәкъдим ителгән иде.