Лениногорскида Татарстан Республикасының юл хәрәкәте иминлеген тәэмин итү буенча хөкүмәт комиссиясе утырышы узды
Лениногорскида Татарстан Республикасының юл хәрәкәте иминлеген тәэмин итү буенча хөкүмәт комиссиясенең күчмә утырышы узды. Утырышта ТР Премьер-министры урынбасары Шамил Гафаров, ТР транспорт һәм юл хуҗалыгы министры урынбасары Артем Чукин, ТР буенча дәүләт юл хәрәкәте иминлеге баш инспекторы Ленар Габдурахманов катнашты.
Республиканың баш инспекторы билгеләгәнчә, Татарстанда юл-транспорт һәлакәтенең кимүе күзәтелә. “8 ай нәтиҗәләре буенча һәлакәт саны 100 фактка кимеде, үлүчеләр саны 52 гә, зыян күрүчеләр саны 80 кешегә кимеде”, -дип җиткерде ул.
Ленар Габдурахманов ассызыклаганча, юл фаҗигаларының төп сәбәбе – җәяүлеләр күчеше кагыйдәләрен бозу һәм каршы як полосага чыгу. Ул җәяүлеләрне автомобиль белән таптату проблемасына аерым игътибар бирде. Моңа җәүяүлеләр күчешләренең, аеруча балалар оешмалары янында аз булуы да ярдәм итә, диде ул.
Моннан тыш, Ленар Габдурахманов, ТР Министрлар Кабинетының 128 урында куркыныч участокларны бетерү буенча карары үтәлешенә алдан нәтиҗә ясады. Федераль һәм төбәк билгеләнешендәге автомобиль юлларында бу эш инде төгәлләнде, дип белдерде ул.