Татарстанда 2012 елның мартында 1,1 млн. дәүләт хезмәте электрон төрдә күрсәтелгән

Бүген Татарстан Республикасы Премьер-министры Илдар Халиков дәүләт, муниципаль һәм социаль хезмәтләрне электрон рәвештә күрсәтүгә күчү мәсьәләсенә багышланган киңәшмә үткәрде. Киңәшмә ТР Хөкүмәт йортында узды, анда министрлыклар һәм ведомстволар вәкилләре катнашты.

ТР Премьер-министры урынбасары – мәгълүматлаштыру һәм элемтә министры Николай Никифоров 2012 елның беренче кварталында башкарылган эшләр һәм нәтиҗәләр хакында доклад белән чыгыш ясады. Бүген Татарстан Республикасында дәүләт хезмәтләре порталында электрон рәвештә 98 хезмәт тәкъдим ителә дип белдерде ул. 2012 елның март аенда халыкка электрон рәвештә 1,1 млн. дәүләт хезмәте күрсәтелгән.

Киңәшмә барышында Илдар Халиков электрон рәвештә күрсәтелә торган хезмәтләрнең гомуми күләмендә торак-коммуналь хуҗалык өлкәсендә күрсәткечләр проценты югары түгел дип билгеләп үтте.

ТР мәгълүматлаштыру һәм элемтә министры ТР дәүләт хезмәтләре порталына кертелгән яңалыклар турында белдерде. Хәзер анда “шәхси бүлмә” пәйда булган. Кулланучы порталның “шәхси бүлмә” бүлегенә теркәлеп, 2012 елның 1 апреленнән алып төрле банкның картасы ярдәмендә электрон түләүләрне, башка хезмәтләрне оператив башкара ала (“шәхси бүлмә”дә ИНН мәгълүматларын, автомобильнең дәүләт номерын яки банк картасының номерларын бер тапкыр гына кертергә кирәк).

ТР мәгълүматлаштыру һәм элемтә министры дәүләт хезмәтләре порталында пәйда булган яңа хезмәтләр турында белдерде. Бу - күп балалы гаиләләр җир участогы алу өчен гариза бирә ала; “Алгарыш” республика мәгариф программасында катнашуга гариза бирергә мөмкин; ЮХИДИ штрафларын берәмләп түгел, ә гомуми пакет белән түләү мөмкин һ.б.

Смартфоннар ярдәмендә электрон рәвештә хезмәтләр һәм белдерүләр алу өчен мобиль сылтамалар тест уза. Алардан май аенда файдалану мөмкин булыр дип көтелә.

Яңа сервислар турындагы мәгълүматлар белән ТР Мәгълүматлаштыру һәм элемтә министрлыгы сайтында тулырак танышып була.