Рөстәм Миңнеханов: "Вузара технология үзәге проекты барлык катнашучыларга да отышлы булачак"

Казанда “Идея” технопаркы мәйданчыкларында вузара технология үзәген төзү кызыксынган барлык якларның ике якка да файдалы хезмәттәшлеге принципларында гамәлгә ашырылырга тиеш. Бүген Татарстан Президенты Рөстәм Миңнеханов үзәкне төзү перспективаларына багышланган киңәшмәдә әнә шул хакта хәбәр итте. “Идея” технопаркында узган киңәшмәдә шулай ук Татарстан Премьер-министрының беренче урынбасары Равил Моратов, республиканың кайбер министрлыклары, ведомстволары һәм югары уку йортлары җитәкчеләре катнашты.

Киңәшмә башланыр алдыннан Татарстан Президенты “Идея” технопаркының наноүзәкне төзү кысаларында төзекләндерелүче бүлмәләрен карады. “Идея” инновацион-җитештерү технопаркы” ААҖ генераль директоры Сергей Юшко хәбәр иткәнчә, хәзерге вакытта ремонтланган бүлмәләрдә җиһазлар урнаштырыла инде, 19 апрельдә эшләтеп җибәрү-көйләү эшләрен башлап җибәрү күздә тотыла.

Технопаркның конференцияләр залында узган киңәшмәдә технопаркта вузара технология үзәген төзү планнары хакында фикер алыштылар. “Идея” инновацион-җитештерү технопаркы” ААҖ генераль директоры Сергей Юшко Татарстан вузларының югары технологияле җиһазларны федераль акчаларга сатып алуын, әмма бу җиһаз өчен тиешенчә әзерләнгән бүлмәләрне үз акчаларына булдырырга мәҗбүр икәнлекләре хакында билгеләп үтте. Шуның белән бергә, С.Юшконың сүзләренә караганда, “Идея” технопаркында наноүзәк программасы буенча мондый бүлмәләр оештырылган инде һәм алардан вузлар да файалана алачак. Шул ук вакытта вузлар үзәктә урнаштырылган җиһазларны мөстәкыйль рәвештә куллану белән бергә, башка тикшерүчеләр өчен дә биреп тора алачак.

ТР Президенты Рөстәм Миңнеханов тулаем алганда мондый үзәк булдыру идеясен хупласа да, кызыксынган барлык яклар белән проектны җентекләп тикшерү һәм аның хакында фикер алышу кирәклеген билгеләп үтте. “Әлеге үзәккә беркем дә берәүне дә көчләп куып кертми, барысы да ирекле һәм ике якка да файдалы булырга тиеш”, - дип ассызыклады Р.Миңнеханов.

“Югары уку йортларының гамәлдәге һәм перспективалы мөмкинлекләрен өйрәнергә кирәк”, - дип белдерде Татарстан башлыгы. Рөстәм Миңнеханов проектны җентекләп өйрәнү өчен эшче төркем булдырырга тәкъдим итте, анда югары уку йортлары, “Идея” технопаркы, «Татнефтехиминвест-холдинг» ААҖ вәкилләре керәчәк.

Рөстәм Миңнеханов яңа җиһазда эшләячәк белгечләрне әзерләү өчен “Алгарыш” программасын кулланырга тәкъдим итте. “Лаборатория бик тә мөһим, әмма эшне оештырачак кешеләр дә зур әһәмияткә ия”, - дип саный Татарстан Президенты.

Ул шулай ук Татарстанга югары класслы белгечләр җәлеп итү өчен Казан венчур ярминкәсе кысаларында яңа үзәкнең мөмкинлекләрен күрсәтүне оештырырга тәкъдим итте.