ТР Президенты Люксембургта “SES” компаниясенең эшчәнлеге белән танышты

Бүген Татарстан Президенты Рөстәм Миңнеханов җитәкчелегендәге Татарстан Республикасы делегациясе Люксембургта Ауропада иң зурлардан саналган “SES” спутник компаниясенең Телекоммуникацияләр белән идарә итү үзәгендә булды. Искәртеп узабыз, Рөстәм Миңнеханов җитәкчелегендәге Татарстан делегациясе Бөек Люксембург Герцоглыгында эш сәфәрендә.

Кунаклар өчен “SES” компаниясе эшчәнлегенең презентациясе оештырылды, аннары Татарстан вәкилләре компания җитәкчелеге озатуында махсус җиһаз белән танышты. Аның ярдәмендә SES компаниясе Интернет-провайдерларга, мобиль элемтә операторларына һәм Хөкүмәт оешмаларына телекоммуникация хезмәтләре күрсәтә.

Бүгенге көндә “SES” компаниясе 50 геостационар иярченне үз эченә алучы, дөнья күләмендә әйдәп баручы спутник операторы санала. Компания 1985 елда оештырыла, аның штаб-фатиры Люксембургта урнашкан. Компаниянең төбәк офислары бөтен дөнья буйлап таралган.

Рөстәм Миңнеханов Телекоммуникацияләр белән идарә итү үзәге эшчәнлеге белән танышты һәм Мактаулы кунаклар китабында язма калдырды. Ул, аерым алганда, “SES” компаниясенең тәҗрибәсе Татарстан өчен бик тә файдалы булырга мөмкин, дип ассызыклады.

Телекоммуникацияләр белән идарә итү үзәге һәм заманча җиһазлар белән танышканнан соң, ТР мәгълүматлаштыру һәм элемтә министры Николай Никифоров “SES” компаниясенең тәҗрибәсе “Татарстан – Яңа гасыр” телеканалы тапшыруларын бөтен дөньяга трансляцияләүне оештыру күзлегеннән Татарстан өчен кызыклы булуын билгеләп үтте.

Татарстан Республикасы делегациясен Россия Федерациясенең Люксембургтагы Гадәттән тыш һәм Тулы вәкаләтле илчесе Александр Шульгин, Люксембургның Россиядәге Гадәттән тыш һәм Тулы вәкаләтле илчесе Пьер Ферринг озатып йөрде