Рөстәм Миңнеханов: "Татарстан делегациясенең Люксембургка сәфәре хезмәттәшлек өчен яңа мөмкинлекләр ача"

Татарстан делегациясенең Люксембургка сәфәре хезмәттәшлек өчен яңа мөмкинлекләр ача. ТР Президенты Рөстәм Миңнеханов бүген Люксембург сәүдә палатасындагы очрашу вакытында шулай дип белдерде. Биредә Татарстан-Люксембург “түгәрәк өстәле” оештырылды, аның кысаларында Татарстанның икътисади һәм инвестиция потенциалы презентацияләнде.

Рөстәм Миңнеханов үзенең чыгышында Люксембургка сәфәрнең күптәннән планлаштырылуын ассызыклап үтте. Аның сүзләренә караганда, моңа Россия һәм Люксембург Илчелекләренең актив эшчәнлеге дә йогынты ясаган. Бүгенге очрашуда Татарстан башлыгы ике арадагы элемтәләрне ныгыту, бизнес вәкилләре республиканың икътисади потенциалын күреп, бәяләсен өчен, Люксембург бизнес җәмәгатьчелеге делегациясенең республикага сәфәрен оештыру тәкъдимен кертте. “Татарстан инвестицияләр салу һәм бизнес алып бару өчен Россиянең кызыктыргыч төбәге”, - дип ассызыклады ул.
Татарстан-Люксембург “түгәрәк өстәл”ендә катнашучыларга Татарстан турында сөйләүче ролик күрсәтелде, соңрак Люксембург икътисады, кайбер компанияләре тәкъдим ителде, дип хәбәр итә ТР Президентының матбугат хезмәте.
Рөстәм Миңнеханов җитәкчелегендәге Татарстан делегациясе, инде хәбәр ителгәнчә, Бөек Люксембург Герцоглыгында кыска вакытлы эш сәфәрендә. Президентны сәфәрдә ТР Премьер-министры урынбасары – мәгълүматлаштыру һәм элемтә министры Николай Никифоров, ТР Президентының Тышкы элемтәләр департаменты директоры - Президентның халыкара мәсьәләләр буенча ярдәмчесе Искәндәр Мөфлиханов, ТР Инвестицион үсеш агентлыгы җитәкчесе Линар Якупов, “Ак Барс” банкы идарә рәисе Роберт Миңнегалиев, ТР сәнәгать һәм сәүдә министрының беренче урынбасары Игорь Носов һ.б. озатып йөри.