Рөстәм Миңнеханов белән Люксембургның Премьер-министры Жан-Клод Юнкер хезмәттәшлек турында фикер алышты

Бүген Татарстан Республикасы Презизиденты Рөстәм Миңнеханов Люксембург Премьер-министры Жан-Клод Юнкер белән очрашты. Очрашуда Россия һәм Люксембург арасындагы мөнәсәбәтләрне үстерү кысаларында Люксембург һәм Татарстанның алдагы хезмәттәшлегенә бәйле мәсьәләләр хакында фикер алыштылар.
 Очрашуда Россия Федерациясенең Люксембургтагы Гадәттән тыш һәм Тулы вәкаләтле илчесе Александр Шульгин, Люксембургның Россиядәге Гадәттән тыш һәм Тулы вәкаләтле илчесе Пьер Ферринг, Тышкы элемтәләр департаменты директоры – ТР Президентының халыкара мәсьәләләр буенча ярдәмчесе Искәндәр Мөфлиханов катнашты.
 Искәндәр Мөфлиханов очрашу тәмамланганнан соң Люксембург Премьер-министры Жан-Клод Юнкерның, федерациянең сәнәгый яктан нык үскән субъектларыннан берсе буларак, Татарстанның икътисади һәм инвестицион потенциалына уңай бәя бирүе хакында хәбәр итте. Ул Татарстан белән Люксембург арасында уртак әйберләр күп булуын билгеләп үтте, диде И.Мөфлиханов.
 ТР Президенты Рөстәм Миңнеханов бизнесны оештыру һәм алып бару күзлегеннән төбәкнең икътисади мөмкинлекләрен өйрәнү өчен Люксембург бизнес-даирәләренең Татарстан Республикасына визитын оештырырга тәкъдим итте. Ул әлеге мәсьәләнең бүген Люксембург икътисад һәм тышкы сәүдә министры Этьен Шнайдер белән очрашуда да күтәрелүен искәртте.
 Жан-Клод Юнкер Люксембург бизнес-даирәләренең 2012 елның ноябрендә Россиягә планлашытырылган визиты кысаларында Татарстанга да килү ихтималын раслады.
 Искәндәр Мөфлиханов ТР Президентының Люксембург Премьер-министры Жан-Клод Юнкерны Татарстан Республикасына чакыруы хакында хәбәр итте. Моннан тыш, республика башлыгы көзен – Люксембург эшлекле даирәләре делегациясенең Татарстанга визиты алдыннан Татарстан бизнес вәкилләренең Люксембургка сәфәрен оештырырга тәкъдим итте. Бу үзара хезмәттәшлек өлкәсен, уртак проектларны билгеләргә мөмкинлек бирәчәк.
 Искәндәр Мөфдихановның сүзләренә караганда, якын көннәрдә эшче төркем оештырылачак, ул Люксембург вәкилләренең Татарстанга визитын әзерләү белән шөгыльләнәчәк.