Рөстәм Миңнеханов һәм Аркадий Дворкович "Яшьләр сигезлеге" конкурсында катнашучылар белән очрашты

Әле эшли генә башлаган вакытта мул тормышның акчаның күпме булуына бәйле икәнлегенә ышана идем. Алар да мөһим, әлбәттә, әмма, барыннан да элек, кеше зур әһәмияткә ия. Татарстан Президенты Рөстәм Миңнеханов Казанда “Яшүсмерләр сигезлеге” Бөтенроссия конкурсында катнашучылар белән очрашуда әнә шулай дип белдерде.

Очрашуда шулай ук РФ Президенты ярдәмчесе, “Яшүсмерләр сигезлеге” конкурсы кураторы Аркадий Дворкович, ТР мәгариф һәм фән министры Альберт Гыйльметдинов, Казан мэры Илсур Метшин катнашты.

Рөстәм Миңнехкановка адресланган сорау Татарстанда яшьләр өчен гамәлгә ашырыла торган проектларга кагылды. “Теләсә ниди яңа эш, модернизация – ул яшьләр. Моның белән алдынгы фикерле яшьләр шөгыльләнергә тиеш. Без ил, төбәкнең көндәшлеккә сәләтлелеге мәктәп, югары уку йортындагы белем дәрәҗәсенә бәйле булачагын аңлыйбыз”, - дип ассызыклады Татарстан башлыгы.

“Күптән түгел узган очрашуда РФ Президенты Дмитрий Медведев Татарстанда Россия дәрәҗәсендәге IT-кластер булдыру турындагы идеябезне хуплады, - дип билгеләп үтте Рөстәм Миңнеханов. – Безгә мондый үсеш нокталары кирәк”. ТР Президентының сүзләренә караганда, Казан IT-паркы тулган инде. Җәен Чаллыда тагын бер IT-парк ачылачак. “Безнең хәзерге вакытта күпләп чит илләргә китүче IT-өлкәдә эшләүче белгечләрне үзебезгә чакыру мөмкинлеге туачак”, - дип ассызыклады ул.

2013 елда Казанда узачак Универсиадага әзерлек хакында сөйләгәндә, ТР Президенты болай дип белдерде: “Әзерлек эшләр билгеләнгән план нигезендә бара. Барлык спорт объектлары да инде сафка басты диярлек – Спортның су төрләре сараен төзү эшләре сентябрь-октябрь айларында төгәлләнәчәк, Гимнастика үзәге инде әзер дисәң дә була, 45 мең тамашачыга исәпләнгән футбол стадионы агымдагы ел ахыры – 2013 ел башында төзелеп бетәчәк. Транспорт инфраструктурасы буенча зур эшләр дәвам итә - аэропорт тулысынча яңартылачак, аэропорттан шәһәр үзәгенә кадәр электричкада 20 минут эчендә барып җитү мөмкинлеге туачак. Универсиадага метроның 10 станциясе әзер булачак. Киләсе елда Казан илнең иң җәлеп итүчән шәһәрләренең берсенә әвереләчәк”.