Рөстәм Миңнеханов Калугадагы "Фольксваген" концернының заводында булды

Бүген Татарстан Президенты Рөстәм Миңнеханов Калуга өлкәсенә эш сәфәре кысаларында “Гестамп-Северсталь” уртак предприятиесе штамповкалау производствосында һәм “Фольксваген” концерны автомобиль заводында булды. Республика башлыгын өлкә губернаторы Анатолий Артамонов озатып йөрде.
“Грабцево” индустриаль паркында урнашкан заводта автомобиль кузовларының штамповкаланган детальләре эшләп чыгарыла. Баштарак завод янәшәдәге “Фольксваген” заводына хезмәт күрсәтү өчен төзелгән, инвестицияләр күләме – 90 миллион евро, җитештерү күләме елына 13 миллион штамповкаланган деталь тәшкил итә. Хәзер предприятиедә «Volkswagen Polo Sedan» автомобиле өчен кузовлар белән бергә, «Renault Duster», «Lada Largus» машиналары өчен дә кайбер детальләр җитештерелә, якын көннәрдә шулай ук Калуга өлкәсендә урнашкан "Пежо-Ситроен-Мицубиси" заводына детальләр китерелә башлаячак. Шуңа бәйле рәвештә заводта яңа штамповкалау линиясе урнаштырылган, җитештерү күләме арттырылган.
ТР Инвестицион үсеш агентлыгы җитәкчесе Линар Якупов хәбәр иткәнчә, Испаниянең «Gestamp» концерны шундый ук производствоны “КАМАЗ” һәм “Форд-Соллерс” уртак предприятиесен детальләр белән тәэмин итү өчен Татарстанда да урнаштырырга ниятли. Санкт-Петербургта узган икътисади форумда шул хактагы килешүгә кул куелды, хәзерге вакытта Испания компаниясе завод төзелеше өчен мәйданчык сайлый.
Татарстан делегациясе әгъзалары шулай ук "Грабцево" индустриаль паркында урнашкан "Фольксваген" автомобиль заводында да булды. Калугадагы заводта Германия концернының дүрт моделе: «Skoda Octavia», «Skoda Fabia», «Volkswagen Tiguan», «Volkswagen Polo Sedan» автомобильләре эшләп чыгарыла. Производство ачуга инвестицияләрнең гомуми күләме 774 миллион евро тәшкил иткән. Заводта 5642 кеше эшли. 2012 елда заводта 162 мең машина эшләп чыгару күздә тотыла.
Татарстан делегациясе кузов һәм җыю цехларында булды. Кузов цехында өч сменага тәүлегенә 650 кузов җитештерелә. Цехтагы остаханә Рөстәм Миңнехановның игътибарын аеруча нык җәлеп итте. Биредә яңа хезмәткәрләр ике атна дәвамында станокларда кирәкле барлык операцияләрне үзләштерә, шуннан соң линиягә чыга.
Рөстәм Миңнеханов җыю цехының һәр хезмәткәре махсус журналда шәхси мөһерен салуга игътибар итеп, предприятиедә сыйфат контроле методикасы белән кызыксынды. Һәр автомобиль шулай ук сыйфат контроле пунктында берничә контроль процедурасы уза. Завод директоры Йозеф Йоханнес Баумер билгеләп үткәнчә, сыйфаты ягыннан "Фольксваген"ның Калугадагы производствосы концернның Ауропадагы башка предприятиеләреннән калышмый.