Рөстәм Миңнеханов: "Без ветераннар игътибарын яңа торакка җәлеп итәргә тиеш"

Бүген ТР Хөкүмәт йортында төзелеш һәм торак тапшыру буенча видеоконференция режимында узган киңәшмәдә Татарстан Президенты Рөстәм Миңнеханов муниципаль берәмлекләр җитәкчеләре алдына Бөек Ватан сугышы ветераннары игътибарын яңа йортларга җәлеп итү бурычын куйды.

Республика районнарында ветераннар фатирларны икенчел торак базарыннан сайлый, чөнки арзанрак. Ә кемдер балаларына якын булу өчен шәһәрдән икенчел торак сатып ала.

ТР Президенты муниципаль берәмлекләр башлыкларына һәм министрлыклар һәм ведомстволар җитәкчеләренә ветераннар Дәүләт торак фонды һәм Баш инвестиция-төзелеш идарәсе аша беренчел торак базарыннан фатир сатып алсын өчен җәлеп итәрлек шартлар тудырырга кирәк диде.

“Яңа матур йортлар төзү исәбенә район үзәкләрен яхшы хәлгә китерү мөмкинлеге бар. Мисал өчен, Арчада яхшы яңа йортлар күп”, - дип билгеләп үтте Рөстәм Миңнеханов.

Моннан тыш, ул Дәүләт торак фонды һәм Баш инвестиция-төзелеш идарәсе аша республиканың башка районында яки шәһәрендә торак алырга теләүче ветераннарга ярдәм итүне йөкләде.

Бүгенге көндә Татарстанда 17 159 Бөек Ватан сугышы ветераны торак шартларын яхшыртуга мохтаҗлар исемлегенә кертелгән, 15636 ветеран субсидия алган, 14819 ветеран тораклы булган.

Республикада 744 ветеран өчен 171 йорт төзелә.

2012 елның 2 нче кварталында ветераннарның торак шартларын яхшырту программасы буенча 183 ветеран өчен 38 торак йорт әзер диярлек.