Тагын бер ай дигәндә, Болгарда өч зур объект ачылачак

“Болгарда эшләр план буенча бара дияргә була, ләкин бик киеренкелек белән. Чөнки кайсыбер объектларны ачуны көзгә планлаштырган идек, әмма республикада билгеләп үтеләчәк бәйрәмнәргә нисбәтләп, торгызыла һәм төзелә торган зур объектларны ике этапка бүлеп тапшырачакбыз” - бүген Изге Болгар җиренә эш сәфәре белән чыгып, шушы борынгы шәһәрдә торгызыла һәм төзелә торган 7 объектта эш барышы белән озаклап танышып йөргәннән соң, ТР Дәүләт Киңәшчесе Минтимер Шәймиев шушы хакта шәрехләде.

Мәсәлән, Идел буе Болгар дәүләтенең рәсми рәвештә ислам динен 922 елда кабул итү вакыйгасына багышлап төзелгән Истәлек билгесе корылмасы 21 майда ачыла, анда дөньядагы иң зур басма Коръән вакытлыча сакланыла торган Кол Шәриф мәчете комплексыннан китертелә. “Икмәк музее” тарихи-этнографик комплексы ачылышы да шушы көнгә билгеләнгән. М.Шәймиев “Ак мәчет” комплексы дип атаган мәдрәсәле, шәйхелислам һәм мөфти хәзрәтләре резиденциясе дә булачак “Болгар” мәчете комплексы исә 10 июнь көнне ачылачак. “Мәчетне, чыннан да, көзгә генә ачу ниятләнгән иде, шулай да, төзүчеләр аны унысына өлгертергә вәгъдәли”, - диде М.Шәймиев. Дөрес, хәзер төзелеш эшләре, эчке бизәү мәшәкатьләренең әле кайнаган чагы булып, эшнең күплеге тулыр-тулмас 1 айда бетәр дә кебек түгел сыман. Комплексның 3 бинасында да эш бик тыгыз, мәчет каршында булачак бассейнның төп һәм ян-як өлешләре ясала, ишегалдына гранит түшәлә һ.б. Минтимер Шәрип улы исә эш барышы белән канәгать, төзүчеләрнең алсыз-ялсыз ничек тырышканы күренеп тора – барысы да килеп чыгар кебек дигән фикердә. Ә инде “Икмәк музее” комплексына карата минем бернинди дә соравым юк - ул әзер, дип канәгатьлек белдерде М.Шәймиев.

Дәүләт Киңәшчесенең эш сәфәрендә ТР Премьер-министры урынбасары Зилә Вәлиева, ТР Премьер-министры урынбасары – ТР авыл хуҗалыгы һәм азык-төлек министры Марат Әхмәтов, ТР мәдәният министры Айрат Сибагатуллин, ТР урман хуҗалыгы министрының беренче урынбасары Харис Мусин, ТР Диния нәзарәте рәисе мөфти Илдус Фәизов һ.б. рәсми затлар, зур белгечләр катнашып, киңәш-табыш итте. Бүген “Икмәк музее” комплексы капкасының ике ягына утыртылган яшь 6 чыршының 2се - М.Шәймиев белән З.Вәлиева истәлеге.