Татарстан һәм iCarnegie арасында меморандум имзаланды

4 сентябрьдә Татарстан Хөкүмәте белән Carnegie Mellon University (CMU) – iCarnegie мәгариф бүлекчәләре мөнәсәбәтләр турында меморандум имзалады. Татарстан ягыннан документка Татарстан Президенты Рөстәм Миңнеханов кул куйды, CMU ягыннан - iCarnegie баш башкаручы директоры Джил Таран (Gil Taran).

3-5 сентябрьдә Рөстәм Миңнеханов җитәкчелегендәге Татарстан Республикасы делегациясе рәсми визит белән Питтсбург шәһәрендә (АКШ). ТР Президенты сәфәрдә ТР Премьер-министры урынбасары – мәгълүматлаштыру һәм элемтә министры Роман Шәйхетдинов, Идел буе федераль университеты ректоры Илшат Гафуров, шулай ук Runa Capital венчур фондының өлкән партнеры һәм Parallels, Acumatica, Acronis, Rolsen компаниясенә нигез салучы Cергей Белоусов озатып йөри.

Татарстанда федераль дәрәҗәдә ел саен 5 мең IT-белгеч әзерли торган халыкара мәгариф үзәге ачу планлаштырыла.

“Татарстанда “Иннополис” проекты уңышлы булсын өчен кадрлар потенциалы һәм көчле мәгариф үзәге төп мәсьәлә икәнен аңлаулары мөһим. Бүген Россиядә безнең вузларда IT-белгечләр әзерләү сыйфаты белән канәгать IT-компания юк, - дип билгеләп үтте Россия элемтә һәм массакүләм коммуникацияләр министры Николай Никифоров. – Иннополис инновацион шәһәр төзелеше проектын Carnegie Mellon University кебек көчле партнер белән IT-университет булдырудан башлау бик дөрес.”

“Безнең бурыч – киләсе көздә проектны эшләтеп җибәрү”, - дип ассызыклады Рөстәм Миңнеханов. Аның сүзләренә караганда, аның өчен Татарстанның һәм Идел буе федераль университетының барлык ресурслары җәлеп ителәчәк.

Татарстан мәгълүмат һәм коммуникацион технологияләр секторыннан керемне 3,5 проценттан 7 процентка кадәр арттырырга планлаштыра. “Бу максатка ирешү өчен 20 мең тирәсе IT-белгеч кирәк, - дип белдерде Роман Шәйхетдинов. – CMU тәҗрибәсе төбәк дәрәҗәсендә халыкара класслы талантлы белгечләр әзерләү мөмкинлеге бирәчәк.

“Татарстан Республикасы үз алдына югары квалификацияле эшче көчләр әзерләү үзәге һәм мәгълүмат технологияләре, мәгариф һәм фәнни-тикшеренү эшләре өлкәсендә элиталы үзәк булу кебек кыю максат куйды, - дип билгеләп үтте Джил Таран. – Бу партнерлыкта без башкара торган роль җанландыра. Татарстан партнеры булу белән горурланабыз”.