Люксембург Бөек Герцоглыгы Премьер-министры Жан-Клод Юнкер бүген КФУда булды

Россиягә эш визиты белән килгән Люксембург Бөек Герцоглыгы Премьер-министры Жан-Клод Юнкер бүген Казан (Идел буе) федераль университетында булды. Аны ТР Президенты Рөстәм Миңнеханов озатып йөрде.

КФУда кунакларны ТР Мәгариф һәм фән министры вазыйфаларын башкаручы Данил Мостафин, КФУ ректоры Илшат Гафуров, вуз студентлары каршы алды.

Хөрмәтле кунаклар башта Казан университеты тарихы музеенда булды. Аннан соң революционер Владимир Ильич Ульянов-Ленин укыган аудиторияне карады. Казан университеты музее бу данлы уку йортының гаҗәеп тарихы турында, танылган галимнәр һәм бу бинада алып барыла торган зур фәнни тикшеренү эшләренең традицияләре турында сөйли. Чит илләрдән кунакларга әлеге шанлы музейны күрсәтми калмыйлар.

Жан-Клод Юнкер КФУның актлар залында университетның хөрмәтле кунаклары өчен булган китапта йөрәк рәсеме белән култамгасын салды. Ахырдан аңа КФУ рәсеме төшерелгән сувенир – барельф бүләк ителде.