Илдар Халиков: “Ветераннарның лаеклы һәм сыйфатлы тормыш шартларын булдыру – безнең өстенлекләрнең берсе”

Бүген Казанда ТР Ветераннары (пенсионерлар) иҗтимагый оешмасына 25 ел тулу уңаеннан конференция узды. Конференция эшендә ТР Премьер-министры Илдар Халиков катнашты.

Чыгышы башында Илдар Халиков Г.Тукай исемендәге Татар дәүләт филармония залында барлык җыелганнарны ТР Президенты Рөстәм Миңнеханов исеменнән сәламләде. ТР Премьер-министры яшь буынны тәрбияләгәннәре, республика тормышында актив катнашканнары, Татарстан иминлеге өчен фидакарь хезмәтләре өчен, ветераннарга рәхмәтен белдерде.

“Мин сезнең күбегезнең һаман да төрле оешмаларда, учреждениеләрдә, предприятиеләрдә, иҗтимагый оешмаларда эшләвегезне беләм. Бу залда булганнар без Татарстан төзелеш дип атый торган күренешнең актив катнашучылары. Без гадәти эштә сез нигез салган иң яхшы традицияләргә таянабыз. Ветераннарның лаеклы һәм сыйфатлы тормыш шартларын булдыру – безнең өстенлекләрнең берсе”, - дип сөйләде ТР Премьер-министры.

Илдар Халиков республикада сәламәтлек саклау системасы үсешенә зур игътибар юнәлтелүен ассызыклады. “2011 нче елда гына сәламәтлек саклау объектлары төзелешенә һәм капиталь төзекләндерүгә 5,6 миллиард сум юнәлдерелгән. Республиканың эре хастаханәләрен модернизацияләү эше бара, - дип хәбәр итте И.Халиков. – 2011 нче ел нәтиҗәләре буенча Татарстан Россиядә сәламәтлек саклауны модернизацияләү программасын тормышка ашыруда иң яхшы күрсәткечләргә ия булды”.

Илдар Халиков республикада Бөек Ватан сугышы ветераннарын һәм аларның гаиләләрен уңайлы торак белән тәэмин итү буенча зур эш алып барылуын искәртте. “Бүгенгә 15 мең ветеран уңайлы һәм сыйфатлы торак белән тәэмин ителгән. Бу максатларга федераль бюджеттан 17 миллиард сум бүлеп бирелгән иде, - дип хәбәр итте Премьер. - Транспортта йөрү, торак-коммуналь хуҗалыгы хезмәтләренә һәм элемтә өчен түләүгә ташламалар ясау буенча социаль ярдәм күрсәтү чаралары бар. Өлкән кешеләр белән нәтиҗәле социаль эшләү технологияләре үсә”.

Моннан тыш, ТР Премьер-министры республикада өлкәннәрнең мәшгульлеген һәм өстәмә белем белән тәэмин итүгә зур игътибар бирелүен билгеләде, “Интернет-озак яшәү”, “Һәркемгә уңайлы мохит” программалары турында сөйләде.

Конференциядә Илдар Халиков бүләкләр дә тапшырды. Яр Чаллы сугыш һәм хезмәт ветераннары иҗтимагый оешмасы советы рәисе Наил Сафинга һәм ТР сугыш һәм хәрби хезмәт ветераннары (инвалидлары) иҗтимагый оешмасы вәкиле Әхмәтҗани Әхмәтҗановка, ветераннарга социаль ярдәм итү буенча актив иҗтимагый эшчәнлек алып барган һәм яшьләргә патриотик тәрбия биргән өчен, РФ Президентының рәхмәте белдерелде.

Республика ветераннары советы рәисе Хәбир Иштирәков үз чыгышында ассызыклаганча, юбилей конференциясе составы - күренекле. “Аңа делегатлар итеп, республиканың барлык муниципаль берәмлекләреннән, ветеран оешмаларыннан 100дән артык кеше сайланган. Катнашучылар арасында – Советлар Союзы Геройлары, Социаль Хезмәт Геройлары, сугыш ветераннары, министрлык һәм ведомство, башка иҗтимагый һәм ветеран оешмалары җитәкчеләре”, - дип билгеләде Хәбир Иштирәков.