ТР Ютазы районы башлыгы сайланды

Бүген Ютазы районы II чакырылыш Халык депутатлары советының XXIII утырышында ТР Ютазы районы башлыгы итеп, Рөстәм Нуриев сайланды.

Утырышта ТР Премьер-министры урыбасары Илдар Халиков, ТР Президенты Аппараты, республика Министрлар Кабинеты вәкилләре, башка түрәләр катнашты.

Көн үзәгендә 4 мәсьәлә иде. Җирле үзидарә органнарына өстәмә депутатлар сайлау нәтиҗәләренә кагылган мәсьәлә буенча районның территориаль сайлау комиссиясе рәисе Кәшиф Вәлиев чыгыш ясады.

Ул барлык сайлау участокларындагы сайлаулар дөрес булуы һәм тәртип бозулар булмау турында хәбәр итте. Сайланган депутатлар исемлегенә 96,3 процент нәтиҗә белән Рөстәм Нуриев кергән.

Соңыннан ТР Премьер-министры Илдар Халиков сайлауларга шундый күп кеше килүе районда халык проблемаларын чишә ала торган берләшкән команда эшләвен раслый, дип билгеләде. “Рөстәм Мидхәт улы үзен принципиаль, җитди җитәкче буларак күрсәтә алды, - дип ассызыклады И.Халиков. – Атна саен без видеоконференцияләрдә районда проблемаларның вакытында хәл ителүен күрәбез”. ТР Премьер-министры Р.Нуриев эшчәнлегенә кыскача характеристика бирде һәм депутатларны тавыш биргәндә, аның кандидатурасы яклы булырга чакырды

“Хөрмәтле депутатлар, республикабыз Президенты кушуын үтәп, район башлыгы итеп, Рөстәм Нуриевны сайларга тәкъдим итәм”, - дип үз чыгышын тәмамлады Премьер-министр.

Моннан тыш, район Советының ике депутаты Нуриевны яклап, чыгыш ясадылар һәм кандидатуралар китерүне бетерергә тәкъдим иттеләр.

Депутатлар тавыш бирүгә киткәнче, аудитория алдында Рөстәм Нуриев чыгыш ясады. Ул үз эшен алып барачак юнәлешләрне кыскача билгеләде,

- бу – мәгариф, авыл хуҗалыгы, төзелеш һәм ТКХ өлкәсе, сәламәтлек саклау, мәдәният һ.б.

“Без нәтиҗә булсын дип, эшлибез һәм эшләячәкбез”, - дип ассызыклады Р.Нуриев.

Район Советының 20 депутаты катнашкан яшерен тавыш бирү вакытында район башлыгы вазыйфасына бер тавыштан Рөстәм Нуриев сайланды.

Илдар Халиков беренче булып район башлыгын котлады һәм аның күкрәгенә билге такты, таныклык һәм чәчәкләр тапшырды.

Рөстәм Нуриев ант бирде һәм сайлаганнары өчен, депутатларга рәхмәтен белдерде һәм аерым рәхмәт сүзләрен ТР Президенты Рөстәм Миңнехановка һәм ТР Премьер-министры Илдар Халиковка әйтте.

“Ютазы район башлыгы вазыйфасын мин безнең халык алдында зур җаваплылык буларак кабул итәм. Сезнең ышанычны аклар өчен, барын да эшләрмен, дип сүз бирәм. Рәхмәт!”, - диде Рөстәм Нуриев.

Киңәшмә соңында район Башкарма комитеты җитәкчесе вазыйфасына конкурс игълан ителде.