"Мәскәү банкы" ААҖ белән хезмәттәшлек турында килешү имзаланды

Бүген ТР Президенты Рөстәм Миңнеханов һәм “Мәскәү банкы” (“Банк Москвы”) президенты-идарә рәисе Михаил Кузовлев хезмәттәшлек турында килешүгә кул куйдылар.

Кул куйганнан соң, ТР Хөкүмәт Йортында журналистлар белән әңгәмәдә Михаил Кузовлев килешүнең асылы турында сөйләде.“Без бүген ТР белән хезмәттәшлек турында килешүгә кул куйдык. Ул, бер яктан, хезмәттәшлекнең гомуми шартларын –ничек төп юнәлешләрне билгеләячәгебезне күрсәтә. Шул ук вакытта безнең бу килешүгә кушымта бар, анда без 13 миллиард сумга проектлар эшләдек. Алдан ук яхшы эш башкарылды”.

Михаил Кузовлев сүзләренчә, “без принциплар турында гына килешмәдек, ә бик күп проектларны эшләдек”. “Бу торак-коммуналь хуҗалыгы, шәһәр хуҗалыгы, транспорт проектлары, инфраструктура проектлары, - дип хәбәр итте ул. – “Мәскәү банкы” стратегиясе – ул шәһәр, республика хуҗалыгы белән эшләү”.

“Проектларны тормышка ашыру 3-5 елга исәпләнә. Ләкин мин кушымтада күрсәтелгән проектлар белән генә чикләнмәбез, дип уйлыйм, - дип белдерде ул. – Бу – башы гына. Без республикада “Мәскәү банкы” филиалы тагын да лаеклырак урында торырга тиеш, дип уйлыйбыз. Чөнки аның өлеше бүген күп түгел – 1 проценттан азрак. Ләкин әгәр дә кредит портфеле ел башына 2 миллиард сумнан артык булса, хәзер ул - 4,5 миллиард. Без ул ел ахырына 5 миллиард сумнан артык булыр, дип өметләнәбез”.

Белешмә өчен. Кул куелган килешү кысаларында “Мәскәү банкы” һәм ТР Хөкүмәте үз көчләрен Татарстан икътисадын үзгәртүгә юнәлтелгән финанс ресурсларын мобильләштерү өчен, берләштерәчәкләр. “Мәскәү банкы” республиканың финанс-кредит базарын үстерү программалрын тормышка ашыруда катнашачак.

Моннан тыш, Татарстанда “Мәскәү банкы” урта, бигрәк тә, кече бизнес предприятиеләренә хезмәт күрсәтүдә лидер булырга планлаштыра.