Татарстан Республикасы буенча Федераль салым хезмәте идарәсе башлыгы Марат Сафиуллин: 3-НДФЛ формасы буенча керемнәр турында декларацияне Татарстанда яшәүчеләр 30 апрельдән дә соңга калмыйча тапшырырга тиеш
Салым хезмәтенә 2024 ел өчен керемнәр турында декларация тапшыру өчен бер атна вакыт калды. Кампания нәтиҗәләре буенча Татарстан казнасына барлыгы 5 млрд сумнан артык акча керергә тиеш. Декларацияне кем тапшырырга тиеш һәм салым законнарында нинди үзгәрешләр булды, дип сөйләде Федераль салым хезмәтенең Татарстан Республикасы буенча идарәсе җитәкчесе Марат Сафиуллин.
Татарстан халкы Федераль салым хезмәтенә 3-НДФЛ формасы буенча керемнәр турында декларацияне агымдагы елның 30 апреленнән дә соңга калмыйча тапшырырга тиеш, дип белдерде Федераль салым хезмәтенең Татарстан буенча идарәсе башлыгы Марат Сафиуллин Татарстан Республикасы Министрлар Кабинетында узган брифингта.
Аның сүзләренә караганда, бу керем алучыларга кагыла: торак, җир һәм транспорт сатудан; милекне арендага бирүдән; кыйммәтле кәгазьләрне сатудан; лотереяда отудан; чит ил чыганакларыннан; кыйммәтле бүләкләрне якын туганнарыннан алмаганда. Шулай ук моны шәхси эшкуарлар, нотариуслар һәм адвокатлар эшләргә тиеш. "Быелның 1 апреленә инде 236 мең декларация тапшырылган, 1,5 млрд сум түләргә дип белдерелгән. Без декларация кампаниясе нәтиҗәләре буенча 5 млрд сумнан артык акча көтәбез, аны быелның 15 июленә кадәр түләргә мөмкин булачак», – дип ассызыклады Сафиуллин.
Федераль салым хезмәтенең Татарстан Республикасы буенча идарәсе башлыгы шулай ук 2025 елның гыйнварыннан НДФЛ ставкалары буенча сизелерлек үзгәрешләр булуын билгеләп үтте. Хәзер 13% күләмендәге салымны елына 2,4 млн сумга кадәр акча эшләүчеләр генә түли. Керемнәре 2,4 млн сумнан 5 млн сумга кадәр тәшкил итүчеләр өчен ставка 15% тәшкил итә, 5-20 млн сум – 18%, 20-50 млн сум – 20%, елына 50 млн сумнан артык акча эшләүчеләр өчен ставка 22% тәшкил итә.
ТР буенча ФСХИ башлыгы сүзләренчә, нигездә Татарстан халкы НДФЛны 13% күләмендә түли, ягъни елына 2,4 млн сумга кадәр акча эшли. 50,3 мең кеше елына 2,4 миллионнан 5 миллион сумга кадәр керем алган, республикада яшәүче 11,7 мең кеше 5 миллион сумнан 20 миллион сумга кадәр, 1 меңнән аз гына күбрәк кеше 20 миллион сумнан 50 миллион сумга кадәр һәм 700 гә якын татарстанлы 50 миллион сумнан артык акча эшләгән. "Бездә бай кешеләр саны даими үсә. 2023 елда Татарстанда 30 миллиардер булса, 2024 ел нәтиҗәләре буенча алар инде 37", - дип өстәде Марат Сафиуллин.
Сафиуллин аерым билгеләп үткәнчә, декларация 5 елдан артык милектә булган күчемсез милекне сатканда бирелми. Моннан тыш, әгәр милек мирас итеп яки гаилә әгъзаларыннан яки якын туганнарыннан бүләккә, хосусыйлаштыру яки рента шартнамәсе буенча алынган булса. Шулай ук әгәр дә кимендә 3 ел булган бердәнбер торак сатылган булса. Әгәр күчемсез милекне сату-алу килешүе буенча сумма 1 млн сумнан артмаса, ә транспорт кебек башка милек очрагында – 250 мең сумнан артмаса, декларация бирелми. «Декларацияне тапшырырга кирәкме, юкмы дигән сорау туа икән, салым хезмәте сайтында махсус чат-бот бар, ул декларацияне тапшырырга кирәкме – юкмы икәнен билгеләргә ярдәм итә», - дип ассызыклады Федераль салым хезмәтенең Татарстан Республикасы буенча идарәсе башлыгы.
Татарстан салым хезмәте җитәкчесе законнардагы үзгәрешләргә аерым игътибар итте. Әйтик, 2025 елда НДФЛ буенча тотып калу өчен максималь суммалар күләме арткан: 50 меңнән 110 мең сумга кадәр – балаларны укытуга, ә фитнес, белем алу, дәвалану һәм башка хезмәтләргә – 120 меңнән 150 мең сумга кадәр. "Тагын бер мөһим үзгәреш: ГТО нормаларын тапшырган һәркем елына 18 мең сум салым тотып калырга хокуклы, шуның 13%ын кайтарып була – бу 2 мең сумнан артык", - дип сөйләде Марат Сафиуллин.
Теманы дәвам итеп, ул ассызыклаганча, икенче һәм аннан соңгы балаларга тотып калулар ике тапкырга арткан: икенче балага - 1,4 меңнән 2,8 мең сумга кадәр, өченче һәм аннан соңгы балаларга 3 меңнән 6 мең сумга кадәр. Сүзен йомгаклап, Татарстан салым хезмәте җитәкчесе билгеләп үткәнчә, быел социаль тотып калуларны алуның гадиләштерелгән процедурасы эшли башлаган. "Без үз сервисларыбызны камилләштерүне дәвам итәбез, һәм бүген без инвестиция һәм милек тотып калуларын автоматлаштырдык, банклардан алыш-бирешләрдән мәгълүмат алабыз һәм салым түләүчеләрнең алдан тутырылган гаризаларын аларның шәхси кабинетларына салабыз. Быел социаль тотып калулар шулай ук цифрлы форматка күчерелде», – диде Сафиуллин.
Ягъни хәзер медицина, спорт, мәгариф өлкәләрендә түләнгән хезмәтләр өчен тотып калу өчен 3-НДФЛ декларациясеннән һәм раслаучы документлардан башка да эшләп була, бу рәсмиләштерү вакытларын сизелерлек кыскартачак.
"Сез хезмәт күрсәтүләр алган учреждениегә алар салым органына түләү буенча мәгълүмат тапшырсын өчен вәкаләт бирү дә җитә. Салым органы исә тотып калу суммасын үзе исәпләп чыгара һәм гражданга бирә. Соңгысына танышырга һәм кул куярга гына кала", - дип өстәде Марат Сафиуллин.