Алексей Песошин РФнең чит илләрдәге сәүдә вәкилләре белән очрашты
Татарстан Премьер-министры Алексей Песошин Россия Федерациясенең чит илләрдәге сәүдә вәкилләре белән очрашты. Делегация составына Россия Федерациясенең Кыргызстандагы, Таҗикстандагы, Төрекмәнстан һәм Мьянмадагы сәүдә вәкилләре керде. Очрашу ТР Хөкүмәте Йортында узды.
Очрашу барышында Татарстанның чит ил партнерлары белән агымдагы сәүдә-икътисади багланышлары, республика предприятиеләренең экспорт эшчәнлеге мәсьәләләре, Татарстан продукциясен чит ил базарларына чыгару һәм яңа урыннарны үзләштерү, логистика һәм төбәкара элемтәләрне үстерү мәсьәләләре турында фикер алыштылар.
Алексей Песошин чит ил партнерлары белән үзара файдалы хезмәттәшлекне үстерүдә сәүдә вәкиллекләренең мөһим ролен билгеләп үтте. Бүген Татарстан халыкара элемтәләрне актив үстерә. 2024 елда республиканың тышкы сәүдә әйләнеше 12% тан күбрәк арткан һәм $16,2 млрд тәшкил иткән. Шул ук вакытта экспорт 20% ка арткан һәм $12,3 млрд тәшкил иткән. «Саннар начар түгел, ләкин яхшырак булырга мөмкин. Бу эштә без сезнең ярдәмегезгә өметләнәбез. Үз чиратыбызда сезгә тулы ярдәм күрсәтергә әзер", - диде Татарстан Республикасы Премьер-министры.
Татарстан бай табигать ресурсларына, уңайлы географик урынга һәм алга киткән транспорт инфраструктурасына, куәтле сәнәгать һәм фәнни комплекска, шулай ук югары квалификацияле кадрларга ия. 2024 елда тулай төбәк продукты 5,2 трлн сум тәшкил иткән.
Республикада нефть чыгару һәм нефть эшкәртү, машина төзелеше, химия һәм нефть химиясе, энергетика тармаклары алга киткән. Җирле предприятиеләр Россия полиэтиленының өчтән берен, синтетик каучукларның 40% тан артыгын, йөк машиналарының яртысыннан күбрәген формалаштыра. Шулай ук Татарстанда самолетлар, вертолетлар, суднолар, йөк автомобильләре, компрессорлар, электрон җиһазлар, медицина инструментлары, дарулар, авыл хуҗалыгы продукциясе һәм башкалар җитештерелә.
Республиканың сәнәгать һәм инвестицион потенциалы турында тулырак ТР вице-премьеры - сәнәгать һәм сәүдә министры Олег Коробченко һәм ТР Инвестицион үсеш агентлыгы җитәкчесе Талия Миңнуллина сөйләде.
РФ Сәүдә вәкиллекләре башлыклары республикага визитлары кысаларында Татарстанның эре предприятиеләрендә булырга һәм аларның мөмкинлекләре белән танышырга планлаштыралар.