Алексей Песошин Лаеш районының Сокуры авылын транспортта урап узу юлын ачуда катнашты
Бүген Лаеш районында Сокуры авылын транспортта урап узучы яңа юлны ачу тантанасы булды. Тантанада Татарстан Премьер-министры Алексей Песошин, Федераль юл агентлыгы җитәкчесе Роман Новиков, «Алексеевскдорстрой» ААҖ Директорлар советы рәисе Фоат Вәлиев катнашты.
Татарстан Республикасында «Волго-Вятскуправтодор» ФКУның төп объектларының берсе булган Сокуры авылын транспортта урап узу юлын төзеп, Р-239 Казан – Оренбург автомобиль юлы участогын реконструкцияләү гамәлгә ашырыла.
Реконструкция III дән ІБ га кадәр юл категориясен күтәрергә мөмкинлек бирә, ә алты километрлы транспортта урап узу юлын төзү транзит транспортны авылдан чыгарырга мөмкинлек бирәчәк һәм юлны уңайлырак һәм куркынычсызрак итәчәк.
Видеоэлемтә аша яңа юл буйлап хәрәкәткә Россия Президенты Владимир Путин старт бирде. Ул билгеләп үткәнчә, тантана транспорт тармагының ике һөнәри бәйрәме – Юл хуҗалыгы хезмәткәрләре көне һәм Автомобиль һәм шәһәр пассажир транспорты хезмәткәрләре көне алдыннан уза.
"Миллионлаган гражданнарыбызның тормыш сыйфаты турыдан-туры ышанычлы, өзлексез транспорт элемтәсенә бәйле. 2030 елга федераль трассаларның һәм эре шәһәр агломерацияләре юлларының, шулай ук Россиянең терәк челтәре юлларының кимендә 85 процентын норматив хәлгә җиткерергә кирәк булачак. Нормативка җавап бирә торган төбәк трассалары өлеше кимендә 60 процент тәшкил итәргә тиеш. Бүген без бу зур, комплекслы эштә тагын бер адым ясыйбыз – юл инфраструктурасының яңа объектларын ачабыз", - диде Дәүләт Башлыгы.
Илдә юл хуҗалыгын үстерүгә юнәлдерелгән чаралар турында Хөкүмәт Рәисе урынбасары Марат Хөснуллин сөйләде. "Системалы һәм җайга салынган эш, иртә контрактация, уңай һава шартлары нәтиҗәсендә бүген юл өлкәсендә без узган ел белән чагыштырганда 29%ка алдан барабыз. Ел йомгаклары буенча 28 мең км юл төзиячәкбез һәм төзекләндерәчәкбез, бу 2024 елга караганда 4 мең км га күбрәк. Мондый нәтиҗәләргә без Президент, Хөкүмәт ярдәме һәм игътибары, Финанс министрлыгы, Транспорт министрлыгы, федераль һәм төбәк хакимиятләре, подрядчылар, челтәр компанияләре белән тыгыз эшләү нәтиҗәсендә ирешә алдык. Тармакта бурычлар әле бик күп, әмма без аларны планлы рәвештә хәл итәбез. Ышанам ки, Ханты-Мансый автономияле округы, Татарстан һәм Карелия Республикаларында яшәүчеләр, аларда бүген Президент тантаналы рәвештә юл объектлары буенча хәрәкәткә старт бирде, алардан уңай нәтиҗәне бәяли алачаклар. Барыгызны да ачылыш белән котлыйм! Яхшы юллар, транспортта барып җитә алу – кешеләрнең уңайлы тормышы өчен чыннан да мөһим шарт. Шуңа күрә бу эшне дәвам итәбез", - диде РФ вице-премьеры.
Алексей Песошин ил Президентына республикага ярдәм иткәне һәм колачлы инфраструктура проектларын гамәлгә ашырганы өчен рәхмәт белдерде. "Бу - М-12 трассасы төзелеше, М-7 реконструкциясе һәм башка проектлар. Болар барысы да яңа мөмкинлекләр тудыра. Р-239 автоюлының хәзерге участогын реконструкцияләү республиканың Лаеш үзәгендә 7,5 млн квадрат метрдан артык торак төзергә мөмкинлек бирәчәк, яңа җитештерү мәйданчыклары барлыкка киләчәк», - диде ТР Премьер-министры.
Төзелеш эшләре 2023 елның октябрендә башланган. Шактый күләмле эшләр башкарылган. Юл өслегенең ныклы нигезен булдыру өчен 475 мең кубометр материал салынган. Нигезнең өске катламы цемент белән эшкәртелгән ком-гравий катнашмасыннан эшләнгән.
Объектта гомуми калынлыгы 22 см булган 212 мең тонна асфальт-бетон салынган, бу хәтта интенсив йөкләнеш булганда да түшәлгән өлешнең норматив ныклыгын гарантияли. 11 км озынлыктагы участокта өч төрле дәрәҗәдәге транспорт чишелеше төзелгән. Аларның икесе (24 нче һәм 29 нчы чакрымнарда) Сокуры авылын урап узу өчен юлның төп өлешеннән уңай төшүне тәэмин итәчәк. 27 нче километрдагы чишелеш төбәк әһәмиятендәге автомобиль юлы белән транспорт элемтәсен яхшыртачак. Объектта гомуми озынлыгы 378 метр булган алты юлүткәргеч төзелгән.
Иминлекне арттыруга аерым игътибар бирелгән. Кара-каршы бәрелешүләрне булдырмас өчен транспорт агымнары тоташ металл барьер киртә белән бүленгән, гомуми озынлыгы 11 км. Бөтен участок буйлап 27,5 км дан артык электр яктырту линиясе урнаштырылган.
Олы Кабан торак пунктында яшәүчеләргә уңайлы һәм куркынычсыз булсын өчен автопавильоны булган ике тукталыш мәйданчыгы һәм аларга җәяүлеләр өчен юллар җиһазландырылган. Шулай ук аз хәрәкәтләнүче гражданнар өчен җайлаштырылган пандуслы җәяүлеләр өчен җир өсте кичүе төзелгән. Тавыш дәрәҗәсен киметү өчен торак пункты янында тавыштан саклаучы экраннар урнаштырылган.
Реконструкция участогында төзелеш эшләре 30+255 тән 43+500гә кадәр дәвам итә. Биредә төп юнәлештәге хәрәкәт полосалары саны икедән дүрткә кадәр арта. 41 нче километрдагы төрле дәрәҗәдәге транспорт чишелеше төзелеше төгәлләнә, ул Лаеш шәһәре белән уңайлы элемтәне тәэмин итәчәк, шулай ук Тургай һәм Каип торак пунктлары янында ике борылыш төзеләчәк.
Мишә һәм Каип елгалары өстендә яңа күперләр төзелгән һәм булганнары реконструкцияләнгән; хәзерге вакытта аларны төзекләндерү эшләре алып барыла. Татарстан Республикасы чикләрендә Р-239 Казан – Оренбург автомобиль юлының гомуми озынлыгы 388,5 км тәшкил итә. Оренбург юнәлешендә хәрәкәт полосаларының санын арттыру буенча эшләр инде берничә ел алып барыла.
2022 елда Казан аэропортына керү юлы ачылган, ә 2023 елда Казанга көньяктан керү юлы (10 нчы километрдан 14 нче километрга кадәр) алты полосага кадәр киңәйтелгән. Хәзерге вакытта 43нче километрдан 53нче километрга кадәр участокка капиталь ремонт ясала, аның кысаларында шулай ук хәрәкәт полосалары санын дүрткә кадәр арттыру каралган.