Юрий Камалтынов: “ЗАГС органнары эшчәнлеге куелган бурычларга туры килергә тиеш”

Гражданлык хәле актларын теркәү (ЗАГС) органнары республика халкы тормышында әһәмиятле роль уйный, һәм аларның эшчәнлеге Татарстан җитәкчелеге тарафыннан куелган бурычларга туры килергә тиеш. Бу хакта бүген ТР Премьер-министры урынбасары Юрий Камалтынов ТР Министрлар Кабинетының Гражданлык хәле актларын теркәү идарәсе коллегиясе утырышында белдерде.

Бу чарада шулай ук ТР Дәүләт Советы рәисе урынбасары Римма Ратникова, ТР Президентының социаль мәсьәләләр буенча ярдәмчесе Татьяна Ларионова, ТР Муниципаль берәмлекләр советы рәисе Минсәгыйть Шакиров һәм башка рәсми затлар катнашты.

Төп докладны ТР Министрлар Кабинетының Гражданлык хәле актларын теркәү идарәсе башлыгы Эльмира Зарипова ясады. Ул хәбәр иткәнчә, 2013 елда ТРның ЗАГС органнары тарафыннан 163 меңнән артык гражданлык хәле актлары теркәлгән (2012 елдагыга караганда 1,3% ка күбрәк). Узган елда республикада 57 мең 214 бала туган, бу 2012 ел белән чагыштырганда 2,2 % ка артык.

Шуның белән бергә республикада инде өченче ел рәттән үлемне теркәүнең кимүе күзәтелә. 2013 елда 46 мең 438 үлем турында акт төзелгән, бу 2012 ел күрсәткечләреннән 0,3 % ка кимрәк.

2013 елда республикада 33 мең 580 пар өйләнешкән, 2012 ел белән чагыштырганда өйләнешүчеләрне теркәү 1,2 % ка арткан. Аерылышучылар саны 1,5 % ка арткан һәм 15 мең 696 акт теркәлгән.
Бүгенгә ЗАГС органнары хезмәтенең 40% электрон рәвештә башкарыла.

Юрий Камалтынов Татарстан Хөкүмәте исеменнән ЗАГС органнары хезмәткәрләренә тырыш хезмәтләре өчен рәхмәт белдерде. “Сез республика халкы тормышында әһәмиятле роль уйныйсыз, һәм сезнең эшчәнлегегез Татарстан җитәкчелеге тарафыннан куелган бурычларга туры килергә тиеш”,- дип тәмамлады ул. Аннан соң Рәхмәт хатларын тапшыру булды.