Борис Павлов: “Евросоюз һәм Татарстанның наноиндустрия өлкәсендәге хезмәттәшлеге уртак инновацион производстволар булдыру мөмкинлеге бирәчәк”

Татарстан Республикасы Премьер-министрының беренче урынбасары Борис Павловның “FWC Commission 2007 – Lot n 5” ЕС проекты менеджеры Карл-Хайнц Ях белән очрашуы барышында Европа союзы һәм Татарстан Республикасының наноиндустрия өлкәсендә хезмәттәшлек итү мәсьәләләре каралды. Очрашу Татарстан Республикасының Россия Федерациясендәге Вәкаләтле вәкиллегендә (Мәскәү) узды.
Сөйләшүләр барышында Европа союзы һәм Татарстан Республикасының инновацион проект һәм программаларны тормышка ашыру, наноиндустрияне үстерү өлкәсендә хезмәттәшлек итү мәсьәләсе, проектларның инициаторлары (эшләүчеләре) һәм башкаручылары арасында турыдан-туры бәйләнешләр булдыруга юнәлтелгән уртак чаралар үткәрү мөмкинлеге каралды.
Борис Павлов Евросоюз һәм Татарстан Республикасының хезмәттәшлеге икътисадның реаль секторын тагын да югарырак технологик дәрәҗәгә чыгарырга ярдәм итәрлек уртак инновацион производстволар булдыру мөмкинлеге бирәчәген билгеләп үтте.
Очрашуда “ЕС ның фән һәм технологияләр өлкәсендә Россия Федерациясе белән хезмәттәшлек итү буенча индикатив программасы” кысаларында уртак эшне дәвам итәргә сүз куештылар. Моннан тыш, килешүче яклар, фәнни-техник эшчәнлек нәтиҗәләрен коммерцияләштерү максатында, якын арада Казанда нефть химиясе, машина төзелеше һәм нанотехнологияләр өлкәсендә инновацияләр кебек мөһим юнәлешләр буенча уртак бизнес-форум оештыру мөмкинлеге турында сөйләштеләр.
Очрашуда Россия Фәннәр академиясенең “Черноголовка” инновацияләр үзәге башкарма директоры Татьяна Колчанова, Россия Федерациясе Сәүдә-сәнәгый палатасының инновацион эшмәкәрлекне үстерү буенча комитет бүлекчәсе рәисе Виктор Малай катнашты.