Татарстанның Үзәк сайлау комиссиясе башлыгы Анатолий Фомин: “Республика парламенты бер генә партияле булмаячак, берничә фракциядән торачак”

Татарстан Республикасы Дәүләт Советына депутатлар сайлау вакытында судның төрле инстанцияләренә 33 эш кергән, аларның 30 ы инде каралган. Бүген Татарстан Республикасы Министрлар Кабинетында узган традицион брифингта журналистларга бу турыда Татарстан Республикасы Үзәк сайлау комиссиясе башлыгы Анатолий Фомин әйтте.
“Нигездә, бөтен эшләр сайлау алды агитациясенә бәйле, чөнки ул иң проблемалы мәсьәлә булып тора – мәгълүмат һәм агитация арасындагы аерманы билгеләү бик авыр”, - диде Анатолий Фомин.
Гомумән алганда, Татарстан парламенты сайланган. Сайлауның якынча нәтиҗәләре мондый: 2 млн. 855 мең сайлаучының 2,2 миллионы (78,4 %) тавыш бирүдә катнашкан.
Тавыш бирү нәтиҗәләре буенча “Бердәм Россия” партиясе – 79,3 %, КПРФ – 11,1 %, “Справедливая Россия” – 4,8 %, ЛДПР 3,08 % тавыш җыйган.
Бер мандатлы сайлау округларында шулай ук “Бердәм Россия” партиясе вәкилләре алга чыккан. Алар 43 бер мандатлы сайлау округында җиңү яулаган. Җиде округта үз-үзен күрсәтүчеләр сайланган.
“Республика парламенты бер генә партияле булмаячак, берничә фракциядән торачак”, - диде Анатолий Фомин.
Журналистларның сорауларына җавап биреп, Татарстан Республикасы Үзәк сайлау комиссиясе башлыгы 2 нче декабрьдән 2 нче мартка кадәр “кайнар линия” телефоннарына сайлаучылардан якынча 400 шалтырату кабул ителүен әйтте (шул исәптән сайлау көнендә - 68 шалтырату). Нигездә, шикаятьләр торак-коммуналь хуҗалыклар һәм транспорт өлкәсенә, агитация материалларын таратуга карый.
Моннан тыш, Үзәк сайлау комиссиясенә гражданнардан 85 гариза, шул исәптән сайлау көнендә 29 гариза кергән (аларның барысы да каралган). Анатолий Фомин сүзләренә караганда, сайлау көнендә бирелгән гаризаларның барысы да күзәтүчеләр хокукын бозуга карый, аларның барысын да КПРФ вәкилләре биргән.