Ел башыннан ТР Президенты каршындагы эшкуарлар хокукларын яклау буенча вәкилгә 57 мөрәҗәгать килеп ирешкән

Бүген Татарстанның Министрлар Кабинетында узган брифингта ТР Президенты каршындагы Эшкуарлар хокукларын яклау буенча вәкаләтле вәкил Тимур Ногманов эшчәнлекнең 2013 нче һәм агымдагы елгы кайбер күрсәткечләре буенча мәгълүматлар җиткерде.

Бизнес-омбудсмен 2013 нче елда ТР Президенты каршындагы Эшкуарлар хокукларын яклау буенча уполномоченный аппаратына килеп ирешкән мөрәҗәгатьләргә анализ ясады. Барлыгы 201 мөрәҗәгать килеп ирешкән: телдән 76, язма рәвештә 125 мөрәҗәгать теркәлгән. Язма мөрәҗәгатьләрнең 43е – эш процессында, алар, башлыча, узган ел азагында килеп ирешкән; 25 е буенча дәүләт органнары тарафыннан эшмәкәрлек эшчәнлеге субъектларына мөнәсәбәттә закон бозулар ачыкланган, вәкаләтле вәкил тыкшынуыннан соң, алар уңай хәл ителгән; 57се буенча эшмәкәрлек эшчәнлеге субъектларына консультацияләр бирелгән. “125 язма мөрәҗәгатьнең саллы өлеше җир һәм милек мөнәсәбәтләренә (32), авыл хуҗалыгына (13), җинаять җаваплылыгына тартуга (15), тикшерүләр үткәрүгә (16) кагылышлы булды”, - дип белдерде Тимур Ногманов.

Аның сүзләренә караганда, әлеге мөрәҗәгатьләр һәрвакыт четерекле, чөнки вәкаләтле вәкилнең тикшерү материалларына үтемлелеге юк. “Без заявка бирүчеләрдән ала торган материаллар белән генә таныша алабыз, һәм кайбер очракларда алар җитәрлек булмый. Эшмәкәрләр хокуклары бозылу күренешләре булмаса, тиешле консультацияләр бирәбез, кайвакыт эшкуарлар белән бергә проблемадан чыгу юлларын эзлибез. Шундый берничә очрак буенча узган елда уңай карарлар кабул ителде”, - дип аңлатты Тимур Ногманов. Аның әйтүенчә, бу эш, беренче чиратта, республика прокуратурасы һәм иҗтимагый берләшмәләр белән бергә алып барыла.

Ел башыннан Эшкуарлар хокукларын яклау буенча уполномоченный апппаратына эшмәкәрләрдән 57 язма мөрәҗәгать килеп ирешкән. Бүгенге көндә алар буенча актив төстә эш алып барыла.

Бизнес-омбудсмен эшмәкәрләрдән алынган мөрәҗәгатьләргә анализ ясалып, Татарстан эшкуарларын тикшерүләр ешлыгы, административ каршылыклар, салым идарәсе, финанслауга һәм мәгълүматка, шул исәптән дәүләт ярдәменә чикле үтемлелек, җирле үзидарә органнарының эшмәкәрлек үсешен җитәрлек кайгыртмавы кебек мәсьәләләр борчыганын билгеләп узды.