2013 елда Татарстанның сәламәтлек саклау өлкәсендә медицина хезмәткәрләре тарафыннан һөнәри һәм хезмәт вазыйфаларын башкарганда 152 җинаять эшләнгән

2013 елда Татарстан Республикасының сәламәтлек саклау өлкәсендә медицина хезмәткәрләре тарафыннан һөнәри һәм хезмәт вазыйфаларын башкарганда 152 җинаять эшләнгән. Бу хакта бүген Татарсатн Республикасы прокурорының беренче урынбасары Артем Николаев Татарстан Республикасы Сәламәтлек саклау министрлыгы коллегиясе утырышында хәбәр итте.

Коллегия утырышы кичә 31 мартта югары медицина технологияләре үзәге бинасында узды (Казан, Оренбург тракты). Төп мәсьәлә медицина хезмәткәрләренең һәм медицина оешмалары башлыкларының һөнәри җаваплылыгын арттыру турында булды.Утырышта ТР Премьер-министры Илдар Халиков, ТР Президентының социаль мәсьәләләр буенча ярдәмчесе Татьяна Ларионова, РФ Тикшерү комитетының ТР буенча тикшерү идарәсе җитәкчесе Павел Николаев катнашты.

Артем Николаев белдергәнчә, республикада гражданнарга сыйфатсыз медицина ярдәме күрсәтү нәтиҗәсендә үлем очраклары ешайды. Барлыгы 2013 елда сәламәтлек саклау өлкәсендә медицина хезмәткәрләре тарафыннан һөнәри һәм хезмәт вазыйфаларын башкарганда 152 җинаять эшләнгән. 396 медицина оешмалары җитәкчеләре дисциплина җаваплылыгына, 95 кеше административ җаваплылыкка тартылган.

Артем Николаев фикеренчә, сәламәтлек саклау өлкәсендәге проблемалар турында республика җитәкчелеге массакүләм мәгълүмат чаралары аша түгел, бәлки Сәламәтлек саклау министрлыгы хезмәткәрләреннән белергә тиеш.
“Әгәр Министрлык киләчәктә дә бу проблемаларны яшереп калу белән шөгыльләнсә, хәл уңай якка үзгәрмәячәк”, дип белдерде Артем Николаев.

Медицина ярдәме күрсәтүдә урнашкан тәртипләрне саклау күбесенчә дәвалау учреждениеләре җитәкчеләренең принципиаль һәм таләпчән позициясеннән тора. Әмма практикада җитәкчеләр үзләре тәртипне бозалар.
“Гомумән Россия буенча гражданнарның өчтән бере генә (Татарстанда бу сан күпкә югары) медицина ярдәме күрсәтү дәрәҗәсе белән канәгать. Сыйфатлы медицина хезмәтен гражданнар түләүсез түгел, акчага да таба алмыйлар. Түләүле хезмәткә мөрәҗәгать итүнең 70%тан артыгы, кешеләрнең дәүләт гарантиясе программасы турында, түләүсез медицина ярдәме күрсәтү шартлары турында белмәүләреннән килә. Мондый буталчыклык коррупциягә китерә, гражданнарны РФ Конституциясе буенча тиешле булган хезмәтләр өчен түләргә мәҗбүр итә. Нәтиҗәдә кешеләрнең хакимияткә һәм дәүләткә ышанычы бетә”, дип белдерде Артем Николаев.