Татарстан Республикасының авыл хуҗалыгы һәм азык-төлек министры Марат Әхмәтов: “Татарстанда азык-төлеккә ваклап сату бәяләрен арттыру өчен нигез юк”

Татарстан Республикасы агросәнәгать комплексының эш нәтиҗәләре буенча, 2009 елның беренче ике аенда республикада ит җитештерү – 6 % ка, сөт җитештерү 2 % ка арткан. Бүген Татарстан Республикасы Министрлар Кабинетында узган брифингта бу турыда Татарстан Республикасы Премьер-министрының урынбасары – Татарстан Республикасы авыл хуҗалыгы һәм азык-төлек министры Марат Әхмәтов әйтте. Брифинг Татарстанның агросәнәгать комплексын язгы кыр эшләренә әзерләүгә багышланган иде.
Чара видеоконференцэлемтә режимында узды, шулай ук Интернет челтәрендә трансляцияләнде. Теләге булган һәркем Татарстан Республикасы Авыл хуҗалыгы министрлыгы башлыгына сорау бирә алды (Татарстан Республикасы Хөкүмәтенең рәсми порталындагы сылтама буенча - www.prav.tatar.ru).
Марат Әхмәтов республика буенча сөт продукциясенә ихтыяҗның кимүен хәбәр итте.
Журналистларның сорауларына җавап биреп, ул Татарстанда икмәк һәм камыр ризыкларына, сөт продукциясенә ваклап сату бәяләрен арттыру өчен нигез булмавын әйтте.
Татарстан Республикасы Авыл хуҗалыгы һәм азык-төлек министрлыгы башлыгы сөтне сатып алу бәясенең һаман түбән булып калуын (литрына 6 сум чамасы) билгеләп үтте. Бу сөткә булган ваклап сату бәясенең кулланучы сатып ала алырлык булып калуына ярдәм итә.
Супермаркетларда сөт продукциясенең кайбер төрләренә бәяләр арту турында сөйләгәндә, Марат Әхмәтов ваклап сатучыларның шул рәвешле чыгымнарын капларга теләүләрен әйтте (бүгенге көндә супермаркетларда сатып алучылар саны беркадәр кимегән).
Татарстан Республикасының авыл хуҗалыгы һәм азык-төлек министры хәзер Татарстанда Россия буенча иң түбән кулланучылар кәрзине булуын искәртте.