Илдар Халиков: “Без Johnson&Johnson белән хезмәттәшлек үсешенә өметләнәбез”

Татарстанның Johnson&Johnson компаниясе белән медицина өлкәсендә озак хезмәттәшлек итүнең уңай тәҗрибәсе бар һәм ул киләчәктә хезмәттәшлек үсешенә өметләнә. Бу хакта бүген Татарстан Премьер-министры Илдар Халиков компания делегациясе белән очрашу барышында белдерде. Очрашуда шулай ук ТР сәламәтлек саклау министры Гадел Вафин, ТР Икътисад министры Артем Здунов, Татарстанның Инвестицион үсеш агентлыгы җитәкчесе Талия Миңнуллина катнашты.

Очрашуны ачып, Татарстан Хөкүмәте башлыгы, Johnson&Johnson делегациясенең килүе республика җитәкчелеге өчен мөһим, чөнки сәламәтлек саклау үсеше, югары медицина технологияләре мәсьәләләре ТР да өстенлекле санала. “Безнең уңай нәтиҗәләребез бар – кеше гомеренең озынлыгы арта, яшь балалар үлеме күрсәткече кими, йөрәккә катлаулы операцияләр күбрәк ясала. Ләкин без зур потенциал да күрәбез, шуңа без Johnson&Johnson белән хезмәттәшлекнең киңәюенә өметләнәбез”, - диде Илдар Халиков.

Аның сүзләренчә, Татарстанның Johnson&Johnson белән хезмәттәшлеге җайланмалар сатып алуда, мәгариф өлкәсендә инде 5 ел санала. 2014 елда гына да республика тарафыннан 22 мең берәмлек хирургия җайланмалары, 600 берәмлек суставларның эндопротезлары сатып алынган. “Сәүдә өлкәсендәге хезмәттәшлектән тыш, уртак җитештерү проектларының да барлыкка килүен телибез”,- дип ассызыклады Илдар Халиков.

“Бүгенге очрашу кысаларында без мәгариф өлкәсендә дә, җайланмалар сатып алуда да хезмәттәшлекнең дәвам ителү юнәлешләрен билгеләүне, шулай ук сезнең медицина производствосының Татарстан территориясендә урнашуын да телибез”, - дип белдерде Илдар Халиков очрашу тәмамланганда, Johnson&Johnson делегациясе әгъзаларына мөрәҗәгать итеп.