Рөстәм Миңнеханов: Татарстанның Эчке эшләр министрлыгы үзенең алдынгы позицияләрен бирми

Бүген Татарстанның Эчке эшләр министрлыгында 2009 елда Татарстан Республикасы эчке эшләр органнарының оператив-хезмәт эшчәнлегенә нәтиҗәләр ясалды. Чарада Татарстан Республикасы Премьер-министры Рөстәм Миңнеханов, Татарстан Республикасы прокуроры Кафил Әмиров, Татарстан Республикасы буенча Эчке эшләр министрлыгы башлыгы Әсгать Сәфәров, шулай ук башка рәсми затлар катнашты.
Үз чыгышында республиканың Премьер-министры эчке эшләр органнарының узган елгы хезмәтен югары бәяләде. “Менә инде озак вакыт дәвамында Татарстан Республикасы буенча Эчке эшләр министрлыгының үз позицияләрен бирмәве бик мөһим. Кризис вакытында криминаль структуралар, гадәттәгечә, активлашырга тырышалар, әмма, бәхеткә каршы, республикада ситуация контрольдә тотыла. Татарстанның Эчке эшләр министрлыгы – барлык министрлыклар арасында иң инновационнардан берсе. Безнең коралланышта соңгы вакытта барлыкка килгән техник һәм технологик мөмкинлекләр - дөньяда иң алдынгылардан. Татарстанның барлык уңышларында хокук саклау органнарының роле зур,” – дип әйтте Рөстәм Миңнеханов.
Татарстан Республикасы эчке эшләр министры Әсгать Сәфәров мәгълүматларына караганда, 2009 елда Татарстанда 16,5 мең авыр һәм аеруча авыр җинаять теркәлгән, бу охшаш узган ел күрсәткеченнән 16 % ка диярлек кимрәк. Шул ук вакытта аларның чагыштырмача өлеше - теркәлгән җинаятьләрнең гомуми массивында 23 % тәшкил итә – Россия (27 %) һәм Идел буе федераль округы (25 %) буенча уртача күрсәткечләргә караганда күпкә кимрәк. Авыр һәм аеруча авыр җинаятьләр ачылу артты һәм 67 % тәшкил итте. Җинаятьләрнең бирелгән категория структурасында яртысыннан артыгы – милеккә каршы җинаятьләр (57 %), наркотиклар белән бәйлеләре - 25 %, тормышка һәм сәламәтлеккә каршы булганнары бары тик 4 % тәшкил итә.