Рөстәм Миңнеханов: “Бүген бөтен төбәкләр өчен бюджет чыгымнарының нәтиҗәлелек темасы мөһим”

Бүген Казан Кремлендә Россия Федерациясе Президенты ярдәмчесе - Россия Федерациясе Президентының Контроль идарәсе башлыгы Константин Чуйченко контроль эшчәнлеге мәсьәләләре буенча киңәшмә үткәрде. Киңәшмәдә Татарстан Республикасы Президенты Рөстәм Миңнеханов катнашты.

Татарстан башкаласына бу чарага РФ Президентының федераль округлардагы тулы вәкаләтле вәкилләренең контроль мәсьәләләре буенча урынбасарлары һәм ярдәмчеләре, шулай ук контроль департаментлары җитәкчеләре чакырылган иде.

Киңәшмәне Константин Чуйченко ачты. Ул, аерым алганда, бүген көн үзәгенә куелган темалар дәүләт сәясәтенең актуаль һәм приоритетлы темалары – бу ил икътисадын модернизацияләү, аның технологик үсеше. Коррупциягә каршы чаралар, бюджет акчаларын нәтиҗәле куллануга да аерым игътибар бирелә.

Константин Чуйченко сүзләренчә, сарыф ителгән акчаларның алынган нәтиҗә белән чагышуын билгеләргә кирәк.

“Киңәшмә үткәрү урыны буларак Казан сайлану очраклы түгел, - дип белдерде РФ Президенты ярдәмчесе, - без еш кына Татарстанны федерациянең башка субъектларына бюджет акчаларын нәтиҗәле сарыф итүче төбәк буларак үрнәк итеп күрсәтәбез”.

Татарстан Республикасы Президенты Рөстәм Миңнеханов киңәшмәдә катнашучыларга сәламләү сүзе белән мөрәҗәгать итте. “Бүген бөтен төбәкләр өчен бюджет чыгымнарының нәтиҗәлелек темасы мөһим”, - диде ул.

Рөстәм Миңнеханов бюджет учреждениеләре челтәрен реформалауга, аларның оештыру-хокукый формасына (бюджет, казна, автоном) үзгәртү процессларына уңай бәя бирде.

Капиталь төзелеш, юл төзелеше, торак йортларны капиталь ремонтлау программасын үтәү кебек тармакларда бюджет акчаларын нәтиҗәле сарыф итү бигрәк тә әһәмияткә ия, дип саный Рөстәм Миңнеханов.

Республикада ЭТИС – электрон тауар-мәгълүмат системасы мәйданы уңышлы эшли дип белдерде Татарстан башлыгы. Ул бюджет акчасын сарыф итүнең нәтиҗәлелеген күтәрергә, чыгымнарның ачык булуын тәэмин итәргә мөмкинлек бирә. Бүген республиканың социаль ипотека, торак йортларны капиталь ремонтлау, шулай ук 2013 елгы Универсиада объектлары төзелеше программаларын гамәлгә куюда ЭТИС куллану тәҗрибәсе бар.

Татарстан Президенты бюджет акчаларын нәтиҗәле сарыф итү кысаларында энергия ресурсларын саклау темасына кагылды. Мисал өчен 2013 елгы Универсиада объектлары энергия саклаучы матеираллар һәм технологияләр кулланып төзелде, дип билгеләп үтте ул.
Капиталь ремонт кысаларында күп кенә йортларда хисап приборлары куела, алар ресурсларны экономияләргә ярдәм итә, диде Рөстәм Миңнеханов.

Татарстан федерациянең башка субъектлары белән бу мәсьәләләр буенча җыйган тәҗрибәсен уртаклашырга әзер.

Рөстәм Миңнеханов сүзләренчә, бүген сәламәтлек саклау һәм мәгариф кебек тармакларда бердәм дәүләт сәясәте төзелергә тиеш. Бу тармакларга күп бюджет акчасы сарыф ителә, әмма белем бирү сыйфаты мактап булмый. Татарстан Президенты фикеренчә, дәүләт хезмәтләре адресланган булырга тиеш. Бу мәсьәләдә “Гражданинның универсаль электрон картасы”н кертүдән зур үзгәрешләр көтәләр.

Аннары РФ Президентының Идел буе федераль округындагы Тулы вәкаләтле вәкиле Григорий Рапота исеменнән РФның ИФО тулы вәкаләтле вәкиле вазыйфаларын башкаручы Валерий Шнякин киңәшмәдә катнашучыларны сәламләде. Татарстан Идел буе федераль округында гына түгел, ә гомумән Россиядә динамик үсеш алучы төбәк һәм киңәшмә тиешле дәрәҗәдә үтәчәк дип белдерде.

ТР төзелеш, архитектура һәм торак- коммуналь хуҗалык министры Марат Хөснуллин 2013 елгы Унимверсиадага әзерлек һәм үткәрү турындагы доклад белән чыгыш ясады.

Соңыннан Россия Федерациясе Президенты ярдәмчесе - Россия Федерациясе Президентының Контроль идарәсе башлыгы Константин Чуйченко 2013 елгы Универсиада объектларын киләчәктә файдалану, “Казан” халыкара аэропортын төзекләндерү, шулай ук 45 мең урынга исәпләнгән футбол стадионы төзелеше буенча сораулар бирде.

Тәнәфестән соң киңәшмәдә катнашучылар РФ Президентының Россия икътисадын модернизацияләү һәм технологик үстерү, коррупциягә каршы эшчәнлек мәсьәләләре буенча йөкләмәләре үтәлү турындагы докладлар тыңладылар.

Киңәшмәдә катнашучылар Казанга визит кысаларында 2013 елгы Универсиада авылында, "IT-парк"та, «Химград» технополисында һ.б. объектларда булачак, дип хәбәр итә ТР Президенты матбугат хезмәте.