Рөстәм Миңнеханов: “Гарәб дәүләтләре белән хезмәттәшлекне үстерү зарур”

Бүген Казан Кремленда ТР Президенты Рөстәм Миңнеханов гарәб дәүләтләре – Кувәйт дәүләте, Согуд Гарәбстаны һәм Бахрейн корольлекләре илчеләрен кабул итте.

ТР Президенты резиденциясендә барган әлеге халыкара очрашуда Татарстан ягыннан ТР Президентының тышкы элемтәләр департаменты директоры – ТР Президентының халыкара мәсьәләләр буенча киңәшчесе Тимур Акулов, ТР Президенты ярдәмчесе Искәндәр Мөфлиханов, ТР сәнәгать һәм сәүдә министры Равил Зарипов катнашты, кунаклар ягыннан – Кувәйт дәүләтенең Россия Федерациясендәге гадәттән тыш һәм вәкаләтле илчесе Нәсер Хаҗи Ибраһим Әл Музайан, Согуд Гарәбстаны корольлегенең Россия Федерациясендәге гадәттән тыш һәм вәкаләтле илчесе Али Хәсән Җаффар, Бахрейн корольлегенең Россия Федерациясендәге илчелеге эшләрендә вакытлыча рәсми вәкиле Әхмәд Абдалла Әл Хармаси Әл Хәҗери.

Соңгы елларда ислам дөньясы белән хезмәттәшлектә эшлибез, республикада төрле чаралар, очрашулар үткәрелә, дистә көн элек кенә Идел буе Болгар дәүләтенең ислам динен дәүләт дине буларак кабул итүенең 1121 еллыгын билгеләп үттек, гомумән, ислам илләре белән багланышларның әһәмиятен Россия Федерациясе җитәкчелеге дә аңлый, бу эштә федераль даирәләр дә ярдәм итә, дип искәртте очрашуны башлап ТР Президенты. Адым арты адым узып, шул рәвешле, без бер-беребезгә якыная барабыз. “Ләкин бу әле эшнең башы гына. Сәүдә-икътисади мөнәсәбәтләрне сыйфатлырак дәрәҗәгә күтәрергә тиешбез, чөнки бу мәсьәләдә эшләр сүлпәнрәк, димәк, аларны җәелдерү кирәк. Болардан кала, Фарсы култыгының гарәб дәүләтләре белән академик һәм фәнни багланышларда, туризм өлкәсендә хезмәттәшлекне үстерү зарур. Рәхим итегез, якын туганнарыбыз, Татарстан җирендә сезне күрүгә без бик шат”, - дип мөрәҗәгать итте Р.Миңнеханов.

Илчеләр дә Татарстан башлыгы фикерләрен хуплауларын белдерде. Бахрейн корольлегенең Россия Федерациясендәге илчелеге вәкиле, Татарстанның ислам дәүләтләре белән региональ гына түгел, халыкара дәрәҗәдә элемтәләр урнаштыруы, төрле чаралар уздыруы – моның республика өчен никадәр әһәмиятле булуына дәлил, диде. Без дә инвестицияләр җәлеп итү, фән, мәдәният, туризм һәм башка өлкәләрдә хезмәттәшлекне җәелдерү яклы, Татарстан Президентының бу мәсьәләләргә карашы белән килешәбез, чөнки андый гамәлләр әлегәчә булган мөмкинлекләрне киңәйтәчәк кенә, дигән фикер белдерде ул.