Рөстәм Миңнеханов РФ Хөкүмәте Президиумы утырышында катнашты

Мисал өчен, В.Путин хәбәр иткәнчә, Россия интервенция ашлык фондын мөмкин кадәр нәтиҗәле тотачак, анда хәзер 9,5 миллион тонна ашлык бар, шуның 3,5 миллион тоннасы – фураж ашлыгы.

Үз чиратында Татарстан Президенты Рөстәм Миңнеханов республиканың 10 ел дәвамында 4-5 миллион тонна ашлык җыеп алуын искәртте. Быел исә табигать көйсезлекләре нәтиҗәсендә фаразлар бер дә куандырырлык түгел – нибары 1 миллион тонна. Шуңа бәйле рәвештә Р.Миңнеханов РФ Хөкүмәте Рәисенә интервенция фондыннан 1 миллион тонна ашлык бүлеп бирү үтенече белән мөрәҗәгать итте.

Владимир Путин әлеге инициативаны игътибарга алды һәм республиканың киләчәккә карап эш итүен, инде хәзер үк әлеге мәсьәләне кайгыртуын исәпкә алып, Татарстанны башка төбәкләргә үрнәк итеп куйды, дип хәбәр итә “Татарстан – Яңа гасыр” каналының Мәскәүдәге хәбәрчесе Динә Газалиева.

Терлекчелек һәм кошчылык предприятиеләре ашлык белән тиешле күләмдә һәм тоткарлыксыз тәэмин ителергә тиеш, дип ассызыклады алга таба Россия Хөкүмәте Рәисе. Аның сүзләренә караганда, бүгенге көндә төп бурычларның берсе – терлекчелектәге җитештерүне саклап калу һәм корылык шартларында терлекләрнең баш саны кимүгә юл куймау.

Авыл хуҗалыгы предприятиеләре ярдәмне тоярга тиеш, диде Владимир Путин. Ул Россиянең Авыл хуҗалыгы һәм Финанс министрлыкларына терлек азыгы сатып алуга субсидия күләмен күздә тотарга күрсәтмә бирде.

Рөстәм Миңнеханов билгеләп үткәнчә, Татарстан – күп санда мөгезле эре терлеге (шул исәптән, шәхси хуҗалыкларда да) булган, терлекчелек тармагы алга киткән республика. Хәзер бөтен халык терлек азыгы әзерләү белән мәшгуль. ТР Президенты фикеренчә, төбәкләргә терлек азыгы сатып алуга дотацияләр бүлеп бирүне күздә тотарга кирәк. “Шуңа да карамастан, без яңгырлар явып узар һәм кукуруз мул уңыш бирер дип өметләнәбез”, - диде ул.