Рөстәм Миңнеханов: Без Татарстанга Япония бизнесын һәм капиталын җәлеп итү яклы һәм хезмәттәшлекне киңәйтүгә шат булачакбыз
Бүген көннең икенче яртысында Татарстан Республикасы Президенты Рөстәм Миңнеханов Япониянең Россия Федерациясендәге Гадәттән тыш һәм Тулы вәкаләтле илчесе Тоёхиса Кодзуки әфәнде белән очрашты. Очрашу Казан Кремленең Губернатор сараенда узды.
“Бу визит сездә Казан турында әйбәт хисләр калдырыр дип өмтәләнәм, - диде илчене һәм аның җитәкчелегендәге делегацияне сәламләп Рөстәм Миңнеханов.
Искәртик, Япония делегациясе Казанга Россия икътисадын модернизацияләү буенча VI Россия-Япония консультатив советы утырышында катнашу өчен килгән (“Корстон” комлпексы мәйданчыгында үткәрелә).
"Без Татарстан Республикасы белән Япония арасындагы элемтәләрне Россия-Япония мөнәсәбәтләре кысаларында киңәйтүгә зур игътибар бирәбез, - диде Рөстәм Миңнеханов. - Катлаулы сәяси вәзгыятькә карамастан, илләребез арасында мөнәсәбәләр прагматик характерда булырга тиеш. Бу хакта безнең җитәкчеләр - Россия Президенты Владимир Путин һәм Япония Премьер-министры Синдо Абэ Владивостоктагы очрашуларында сөйләштеләр".
Татарстан Президенты халыкара сәяси климат нормальләшер дигән ышаныч белдерде. Эшлекле даирәләр үз хөкүмәтләреннән уңай импульслар көтәләр, дип саный ул.
"Без үз чиратыбызда, Япония бизнесын һәм капиталын җәлеп итү яклы һәм элемтәләрне киңәйтүгә шат булабы. Һәр яктан ярдәм итәргә әзербез", - дип белдерде Татарстан Президенты.
Ул шулай ук быел февраль азагы – март башында Япония башкаласы Токиога баруын, Татарстан делегациясенең “Россия – Япония сәүдә-сәнәгать диалогы” бизнес-миссиясендә катнашуын искәртте. Августта республикага Япониядән Премьер-министрның махсус киңәшчесе Эйити Хасэгава җитәкчелегендә делегация килде. Аның сүзләренчә, Татарстан делегациясе отябрь аенда Токиога Җәмгыятьтә фән һәм технологияләр халыкара форумына барачак.
"Татарстанның Япония партнерлары белән хезмәттәшлек тәҗрибәсе бар, - дип белдерде Рөстәм Миңнеханов. - Аерым алганда, “Митсубиси Хэви Индастриз” һәм “Соджитс” компанияләре белән берлектә Менделеевскта минераль ашламалар җитештерә торган “Аммоний” заводы ачылды. Без алга таба да бу проектны үстерергә планлаштырабыз, “Аммонии-2” турында уйлыйбыз. Моннан тыш, Япония компаниясенең “ТАИФ” компанияләр төркеме белән эшләр алып бара. Япониянең “Йокогава” компаниясе предприятиеләрне автоматлаштыру буенча һәм инжиниринг үзәкләре белән эшли. Татарстанның “Эйдос” компаниясе Япония институтларының берсе белән генетик диагностика өлкәсендә проект булдырды. Башка проектлар да бар”.
“Без Япония бизнесы белән элемтәләрне киңәйтүгә шат булачакбыз. Япония компанияләренең шактыеның технологияләре һәм капиталы безнең респубикада файдаланыла – нефть химиясе производствосы төзегәндә, сәламәтлек саклауда, авыл хуҗалыгында, мәгълүматлаштыруда. Безгә алга таба да булган икътисади мөмкинлекләрне үзара файдалы хезмәттәшлекне арттыруга корырга кирәк”, - диде Татарстан Президенты. Шул ук вакытта ул, Япониянең кече һәм урта компанияләрен җәлеп итү буенча эш җайга салынмаган, ул сизелерлек нәтиҗә бирә алыр иде, дип таныды.