Равил Моратов Казанның Идел буе районы базары эшчәнлеген вакытлыча туктату белән янады

Бүген ТР Премьер-министрының беренче урынбасары Равил Моратов Казан тимер юл вокзалы, метро (аерым алганда, аның “Кремль” станциясе), “Үзәк” автовокзал кебек транспорт инфраструктурасы объектларында куркынычсызлыкның тәэмин ителешен тикшерде. Моннан тыш, ТР Премьер-министрының беренче урынбасары Идел буе районы базарында да булды.

Р.Моратов иң беренчеләрдән булып тимер юл вокзалын карады. Биредә ул аның территориясенә Идел ярыннан бернинди тоткарлыксыз үтеп керергә мөмкин икәнлеген үз күзләре белән күрде. ТР буенча эчке эшләр министры Әсгать Сәфәров моңа җавап итеп ТР буенча Эчке эшләр министрлыгының “Россия тимер юллары” ААҖнә вокзал территориясен койма белән әйләндереп алу тәкъдимен җиткерүен белдерде.

«Метроэлектротранс» муниципаль унитар предприятиесе генераль директоры Әсфан Галәвов тикшерү барышында пассажирларның иминлеген арттыру проектының инде әзерләнүе хакында хәбәр итте. Әлеге чаралар, мисал өчен, станциягә керү юлында металл детекторлар урнаштыруны үз эченә алачак. Шуңа да карамастан, ул әлегә юк. Ә.Галәвовның сүзләренә караганда, әлеге максатларга федераль бюджеттан 75 миллион сум акча бүлеп бирелергә тиеш.

“Үзәк” автовокзал җитәкчелегенең сүзләренә караганда, территориядә даими рәвештә 4 милиционер кизү тора, аларның икесенә автовокзалга килүчеләрне тикшерү вазифасы йөкләнгән.

Бүгенге тикшерү күрсәткәнчә, иң катлаулы вәзгыять – Идел буе районы базарында. Базар администрациясе территориядә 8 шәхси сак предприятиесе хезмәткәре эшли дип ышандырса да, сәүдә рәтләрендә тәртипсезлек хөкем сөрә, мондый шартларда бирегә килүчеләр һәм базар хезмәткәрләренең иминлеге хакында сүз дә булырга мөмкин түгел. Равил Моратов, әгәр территорияләрендә тиешле куркынычсызлык тәэмин ителмәсә, кешеләр күпләп җыела торган урыннар, аерым алганда, Идел буе районы базары эшчәнлеген вакытлыча туктатырга вәгъдә бирде.

Р.Моратовның сүзләренә караганда, транспорт инфраструктуарсы объектларын һәм кешеләр күпләп җыела торган урыннарны саклау белән милиция хезмәткәрләре генә түгел, ә шәхси сак предприятиеләре дә шөгыльләнергә тиеш. “Һәр объектта милиция һәм шәхси сак предприятиеләре арасындагы җаваплылык зоналарын төгәл бүләргә кирәк, - диде Р.Моратов. – Шәхси сак предприятиеләре хезмәткәрләре барлык объектларда да бик йомшак эшли. Бөтенесе дә объектларны саклау белән Эчке эшләр министрлыгы хезмәткәрләре шөгыльләнергә тиеш дип саный, әмма аларга бөтенләй башка вазифалар йөкләнгән”.

Равил Моратов шулай ук Казанның Кремль урымындагы пабта күптән түгел чыккан янгынны искә төшерде. Аның залында шулай ук шәхси сак предприятиесе хезмәткәре кизү торырга тиеш булган. Аның бурычы – янгын чыккан очракта кешеләргә эвакуация юлларын күрсәтү.

Тикшерү ахырында ТР Премьер-министрының беренче урынбасары билгеләп үткәнчә, бүген алар булган барлык объектларда да куркынычсызлыкны көчәйтү буенча кайбер чаралар үткәрү бурычы тора.