Татарстанның 235 торак пунктына су басу куркынычы яный

Быел язын, әгәр тиз арада кар һәм боз эри калса, ул шулай булыр дип көтелә дә, Татарстанның 235 торак пунктына су басу куркынычы янаячак, бу исә 18,8 мең кешенең тормыш-яшәешенә, көнкүрешенә китереп суга дигән сүз.

Әлеге торак пунктларда 10 фельдшерлык-акушерлык пункты, социаль өлкәнең 60 объекты, 142,1 чакрымлык элемтә линиясенең 67 объекты, 194,3 чакрымлык электр линиясенең 82 участогы, авыл хуҗалыгының 39 объекты исәпләнә, автомобиль юлларының 57 участогына (аларның гомуми озынлыгы 106,3 чакрым), аеруча 61 күпергә куркыныч яный. Шулай ук авыл хуҗалыгы өчен мөһим булган 8939,3 гектар болын су астында калырга мөмкин. Һәрхәлдә, белгечләр фаразлары язны шундый куркыныч сурәттә күрергә нигез бирә. Елгаларда бозлар тыгылып-өелеп торырга мөмкин, урманнарда карның тирән булуын исәпкә алып, су басуның икенче “дулкыны” килү ихтималы бар. Аерым алганда, 1979 елдагы яз галәмәтләре кабатланыр дип фаразлана. Моннан тыш, җир өстендә быел карның калын булуы сулыкларга күпләп пычрак су агып төшүе, шул рәвешле, ачык сулыклардагы суның сыйфатын начарайтуы бик мөмкин.

Бүген “Корстон” сәүдә-күңел ачу комплексында ТР Премьер-министрының беренче урынбасары Равил Моратов җитәкчелегендә һәм кайбер министрлыклар, ведомстволар, республика муниципаль берәмлекләре Башкарма комитетлары башлыклары катнашында барган “түгәрәк өстәл” утырышында быел язгы ташуга каршы күреләсе чаралар, шуңа бәйле гадәттән тыш хәлләрне кисәтү, бетерү подсистемалары звеноларының көче һәм чаралары әзерлеге турындагы сөйләшүдә шул хәлдән чыгу юллары каралды.